Mizoram State Healthcare Scheme changtlung zawka kalpuina turin ADB loan sign fel a ni tawh

Mizoram sawrkarin Mizoram State Healthcare Scheme changtlung zawk kan neih theihna tura Asian Development Bank (ADB) atanga Loan Assistance hmuh tuma rei tak hma a lo lak tawh chu tih puitlin niin kumin January 23 khan Loan agreement sign fel a ni ta.

Hemi chungchanga Mizoram sawrkar Finance Department thuchhuah siamin a tarlan danin, ‘Supporting Public Health Care System Strengthening to Achieve Universal Health Care for Mizoram’ atana ADB loan lakna tur hi kumin January ni 23 khan Manila-a ADB Headquarters-ah sign niin India aiawhin Baldeo Purusartha, Joint Secretary, Department of Economic Affairs, Ministry of Finance leh ADB aiawhin Mio Oka, Country Director, Director, India Resident Mission chuan hming an ziah hnan a, Mizoram sawrkar aiawhin Ramchuana, Finance Secretary chuan a hmuna kal lovin e-mode in a sign ve bawk a, Loan ID L-4718 pek a ni.

Hemi atana Mizoram sawrkarin loan project a siam ‘Improvement of Mizoram State Health Care Scheme by enhancing the Corpus Fund’ tih chu May ni 31, 2022 khan Ministry of Finance chuan a lo pawm tawh na a, harsatna hrang hrang avangin approve theih lohin a awm a, sawrkar thar chuan thar thawh lehin ‘Supporting Public Healthcare System Strengthening to Achieve Universal Health care for Mizoram’ tiha thlak niin tih tur hrang hrangte tih a ni a, Ministry of Finance lama harsatna kan tawh loh nan Chief Minister Lalduhoma leh Health Minister Lalrinpuii te chuan Union Finance Minister chu hmaichhan ngeia sawipuiin, D.O. Letter te an pe tel bawk a. Department of Expenditure, Ministry of Finance a zohnahthlak Secretary awm thar – Vumlunmang Vualnam IAS pawh hmaichhan-a hmuin theihtawp chhuahpui turin ngen a ni a. Finance Department hotute pawhin Central Ministry-ah kalchilhin an nawr bawk a. Hun rei tak buaipui a nih hnuah October ni 23, 2025 khan loan negotiation neih niin ADB Board chuan December ni 5, 2025 khan loan chu a lo approve a. Loan approve a nih hnu hian Thlasik chawlhin zuiin January ni 23, 2026 khan Hybrid Mode (a tak leh video mode tangkawp) in sign a ni ta chauh a ni.

Mizoram Universal Healthcare atana ADB atanga loan hmuh zat (loan component) hi US Dollar 108 million niin India pawisa chuan cheng vbc. 800 vel a ni a. ADB loan pumpui hi Ministry of Finance hnuaia Externally Aided Projects (EAP) hnuaia hmuh a nih avangin Government of India-in a rulh tur a ni a. Government of India, Ministry of Finance in a rulhna tur interest rate hi SOFR (Secured Overnight Financing Rate) tih niin 3.6% per annum vel bawr ni tura chhût a ni a. Central sawrkar hian loan pumpui atanga 90% hi grant angin Mizoram a pe anga, 10% (cheng vbc. 80) hi Mizoram sawrkar hnenah loan anga Mizoram in a rulh ve turin a puktir chhawng dawn chauh zawk a. Mizoram sawrkarin he 10% a rulh ve tur chin a rulhna tur interest rate hi chu Central sawrkara Ministry of Finance in a la ruahman tur a ni a, State Development loan (OMB) ang vel tura beisei niin 7-8% interest vel tur a ni ang.

MUHCS atana ADB atanga sum puk hi thil danga hman tur ni lovin MUHCS Corpus Fund atan chauha hman tur a ni a, Loan amount atanga zaa sawmkua (90%) lai sawrkar laipui in a rulh dawn avangin MUHCS atana State Sawrkar sum sen chu nasa takin a tlahniam dawn a ni.

Sawrkar thuchhuah chuan he loan a hlawhtlin theihna tura theihtawp chhuahpuitu, Ministry of Finance Department of Expenditure-a Secretary Vumlunmang Vualnam chungah te, a tir atanga buaipuitu Department of Economic Affairs-a Joint Secretary leh Serchhip Bawrhsap hlui Juhi Mukherjee chungah te, Ministry-a thawktu zawng zawng te, ADB lam atanga buaipuitu Dr. Nishant Jain leh a Team-te bakah, Mizoram lam tih tur hrang hrang tha taka bawhzuitu zawng zawngte chungah lawmthu an sawi bawk a ni.