Raltlan Biometric Enrolment za zela 90 ti tawh

Mizoram-a Myanmar raltlan awm mek te an kutzia leh pianphung chhinchhiaha Biometric Enrolment kalpui mekah raltlan za zela 90 te chhinchhiah an ni tawh.

Home Department chhinchhiah danin Mizoram-ah hian Myanmar atanga raltlan rawn lut leh an rama kir an awm belh deuh reng a, Myanmar raltlan awm tamna ber Champhai District-ah January thla tawplam khan mi 231 an lo luh belh a, February thla chawlhkar khatna chhung khan mi 137 lo lut lehin Falam Township lama Myanmar sipai leh Chin ralthuam keng pawl te an inkah nasat zual vang ni a hriat a ni. Chhinchhiahna hnuhnung berah kar kalta Zirtawpni thleng khan Mizoram pumah Myanmar raltlan 28,355 an awm mek a, an zinga mi 26,381 te kutzia leh mitnaute thla lak (biometric enrolment) hna zawh a ni tawh a, hei hi za zela 93.04 lai a tling tawh a. District 4 - Aizawl, Lunglei, Champhai leh Serchhip District-ah te chuan Myanmar raltlante biometric enrolment hna hi an zofel tawh a, Champhai District-ah hian a lo lut tharte pawh chhinchhiah fel vek an ni tawh a ni.

Hetihlai hian Siaha, Kolasib, Saitual, Mamit leh Khawzawl District-ah te chuan January thla chho atang khan Biometric Enrolment hna kal mekah hmasawnna a awm lova. Myanmar raltlan tamna ber dawttu Lawngtlai District-ah pawh a District a zau avang leh hmun kilkhawr tlawhpawh harsa a tam avangin hna a kal muang hle a. Lawngtlai District-ah hian Myanmar raltlan mi 5,034 an awm mek nia chhinchhiah a ni a, January thla a raltlan awm zat aia mi 983 zeta an kiam tawh hnuah pawh Biometric Enrolment hi za zela 73.04 chauh an la zo a ni.

Bangladesh atanga raltlan chhinchhiah hna pawh raltlan 235 awmna Serchhip District, raltlan 76 awmna Lunglei District leh raltlan 7 awmna Aizawl District-ah te zawhfel a nih tawh laiin raltlan 2,042 awmna Lawngtlai District-ah chuan tlemte chauh chinchhiah an la ni.