Health Minister hnenah Women Icon Award 2026 hlan

Nimin khan New Delhi-a Le’ Meridien Hotel-ah ‘National Summit 2026 - Vikshit Bharat 2047 through Comprehensive Socio-Economic Development’ neih a ni a, he hunah hian Health Minister Lalrinpuii chuan ‘Women Icon Award 2026’ chawimawina a dawng a ni.

Achievers’ World leh Indian Achiever Forum tangkawpin an buatsaih he hunah hian Health Minister Lalrinpuii hi India-in Kum 2047-ah Developed Country a nih theihna tur atana hmalakna - Mission Viksit Bharat huangchhunga tehfung pawimawh tak pakhat Healthcare Sector-a Mizoram Health Department an thawh that em avang te, Mizoram Universal Health Care System (MUHCS) tha tak, mi tin ban phak buatsaih a nih avang te, thingtlang mite’n zangkhai zawk leh awlsam zawka ruang an phurh theihna tura Social Walfare-in mipui tan a ruahman avang te, kum kalta chhunga Mizoram chu India ram State hrang hrang zinga kum khat hnuailam thi zat (Infant Mortality Rate) hniam berna pawl an nih theih avang te, Mizoram Health Systems Strengthening Project (MHSSP) kaltlanga Damdawi In hrang hrangte thawmthat an ni leh sawrkar Damdawi In tam takte’n Damdawi In tha (quality) tehna NQAS certificate dawng theia an inhlankai avangte in Award hi hlan a ni.

He hunah hian Health Minister Lalrinpuii hi khual zahawm ni bawkin Mizoram tana a hnathawh avanga chawimawina an pekah lawmthu a sawi a, he Award a dawn theihna chhan chu mimal hmalakna ni lovin, Department officials fel tak takte nena theihtawpa ram leh hnam tana an thawhhona vang a nih thu a sawi a. Mizoram chu India rama CSR Fund hmu tlem ber a nih avangin a bikin Central sawrkar-in a ngaih pawimawh em em, Health & Nutrition Sector-a thawhho puiah he hun hmanga kalkhawm, Corporate lam hotute chu a sawm zui nghal bawk a ni.