Press Tour-a kal tur vailiam

Information & Public Relations, Printing & Stationery Minister B. Lalchhanzova chuan I&PR Directorate buatsaiha ni sarih chhung awh tur Delhi-a Press Tour-a zin tur Mizoram Journalist Association (MJA) member 8 leh I&PR Directorate aiawh mi 2 te chu nimin khan Aizawl atangin a vailiam a. Mizo Journalist-te fuihna thu sawiin IPR Minister chuan zin chhuak turte chu Mizo tana palai, Mizo hmel lanna tur an nih bakah Mizo mipuite tan pawha Mizoram pawn thlirna mit an ni tih a sawi a, Press Tour chu inzirzau nan leh ram tana hlawkna hawn thei tura hmang turin a fuih a. An rawn let huna an zin report ngaihnawm leh bengvarthlak tak chhiar a beisei thu leh hmun dangah pawh Press Tour la neih zel tura ruahman a nih thu a sawi bawk.

He hunah hian MJA President C. Lalrambuatsaiha pawhin Press Tour lo neih tawh thin a nih dante leh Minister chak tak hnuaia neih a ni leh thei chu lawmawm a tih thu a sawi a. Zin turte chu tluang taka an hun hmang tura duhsakna hlanin, hotute zai ngai zel turin a fuih bawk.