Provisional Adhoc-a dah phutin Serchhip-ah kawngzawh a ni

Nimin khan Provisional Adhoc GIA School Union, Mizoram te chuan Serchhip-ah Special Conference neiin Provisional Adhoc dinhmun a dah an phut lantir nan kawng an zawh nghal bawk.
Provisional Adhoc GIA School Union, Mizoram hian Serchhip Kawnpui VC Hall-ah Special Conference hi neiin Provisional Adhoc HSS Association President Lalbiakngura Pautu chuan a kaihruai a, he pawl-a tel High School leh Higher Secondary School aaiawh ten report pein Provisional Adhoc chungchanga an ngaihdan te pawh heng pawl aiawhte atang hian ngaihthlak a ni bawk.

Hemi hnu hian Rorel Inkhawm neih zui niin Mizoram sawrkar in an tana Dan a siam, ‘The Mizoram Education (Provisional Adhoc Grant-in-Aid for General Maintenance of Private School) Rules, 2025’ hmang mai tura an in ngaih laia ‘The Mizoram Education (Lumpsum Grant-in-Aid for General Maintenance of Private School) Rules, 2025’ hmang tura ruahmanna a siam chu hriatthiam har an tih thu leh an lungawi loh thu an sawi a. Provisional Adhoc Rules hi Financial Year thar-a hman tan tur tura sawrkar an phut thu sawiin, ‘Kan sawrkar hian Provisional Adhoc ah min hlangkai thuai rawh se’ tih leh ‘Sawrkar atanga thu lawmawm kan hriat loh chuan Promotion Exam Result Witheld a ni ang’ tih te Resolution siamin an pass bawk a ni.

Nimin-a Special Conference an neih zawh hnu hian Serchhip Kawnpui VC hall Tual atanga tanin Serchhip Venglai-a SBI Office Tual thlengin kawng an zawh nghal a, ‘Sawrkar hian kan dinhmun tur dik tak Provisional Adhoc-ah min dah rawh se’ tih te; ‘Keimahni puala siam Pro Adhoc Rules hi a taka hman ni rawh se’ tih leh ‘Pro Adhoc Rules effective date atan 1st April, 2026 kan duh’ ti te in an aurual a, he hunah hian Mizoram hmun hrang hrang atangin mi 250 vel zet an tel a ni.