Pipe-a gas sem inhrilhfiah

Tripura Natural Gas Company Limited (TNGCL) leh Mizoram sawrkar-a FCS&CA Department tangkawp buatsaih, Pipe hmanga Gas semchhuah dan tur chungchang inhrilhhriatna, ‘Sensitization Workshop on City Gas Distribution (CGD)’ chu nimin khan Aizawl-a ATI Auditorium-ah neih a ni a, he hun hi Supply Minister B. Lalchhanzova chuan khuallian niin a hmanpui a. Supply Minister chuan Indradhanush Gas Grid Limited (IGGL)-te’n March 2027-a Sihhmui thleng Gas Pipeline an phum thlen hnua TNGCL-in Aizawl leh Mamit-a Piped Natural Gas (PNG) hman tura an thlun tur chu kum 2028 kumtir chho ah Mizo mipuite’n an hman tan theih beisei chunga hmalak lawk theih ang ang a rang lama bawhzui tan tura a beih thu a sawi a ni.

Natural Gas Pipeline hi Panisagar Terminal, Tripura atanga intan niin Sihhmui (Mizoram) ah Receiving Terminal bun a ni dawn a. Panisagar leh Sihhmui (Mizoram) inkar pipe thui zawng hi Km 119.5 niin Pipe diameter hi feet 1 a ni a, leimin leh shock laka him tur pipe hman a ni.