Mizo Students’ Union (MSU) Silver Jubilee lawm a ni

Mizo Students’ Union (MSU) in kum 25-a tlinna, Silver Jubilee lawmna chu nimin khan Aizawl-a Vanapa Hall-ah neih niin Home Minister K. Sapdanga chuan khuallian niin a hmanpui a ni. MSU Silver Jubilee lawmna ah hian Home Minister chuan Mizote All India Service-ah kan inziak tling thei ta lo chu veiawm a tih thu a sawiin, tun dinhmuna Mizo zirlai ten kan mamawh chu thiamna tak tak nei tura lehkha zir a ngai tih a sawi a. Hlawhtling tur chuan thiamtheih ai mahin thawhrimna leh taimakna kan mamawh thu leh he ram leh hnam tan leh kan tu leh fate tana ram nuam siam turin tuna zirlai te hian mawh an phurh thu a sawi bawk a ni.

MSU Silver Jubilee lawmna hi Vice President Roluahpuia chuan kaihruaiin an President B. Lalkhawngaihzuala chuan Pathian kaihhruaina a kum 25 hmel an hmu ta chu lawmawm a tih thu a sawi a, zirlaite leh ram leh hnam tana ding a nih angin, pawl rinawm leh innghahna tlak a ni ta chu lawmawm a tih thu leh Zirlaite leh ram leh hnam tan ke an pen zel tur thu a sawi bawk.

He hunah hian Report ngaihthlak a nih bakah MSU sulhnu te thlirho a ni a, hruaitu lo ni tawh te leh hruaitu ni mek thenkhat te pawhin thu an sawi bawk a ni.