Bharat Gaurav Train lo hmuak

Tourism Department leh Indian Railway Catering and Tourism Corporation ten August, 2025-a MoU an ziah bawhzuiin a vawikhatna atan India hmarchhak fang kual lai mek ‘North East Discovery Tour’ chuan nimin khan Sairang Railway Station a rawn thleng a, Tourism Department-a thawktu ten an lo hmuak a ni. Bharat Gaurav Train hi khualzinte tana siam bik niin mi 150 a phur thei a, a chhungah Restaurant pahnih leh Spa te awmin Rel dang nen a inang lo a. Indian Railway Catering and Tourism Corporation hian India hmarchhak tan bik kum khat ah tum khat Tour Package an siam thin a, a duh apiang tan a tel theih a. Tun tuma mi hi Agartala (Tripura) atanga rawn thleng niin khualzin 81 a rawn phur a, nimin khan Aizawl khawpui chhung hmun hrang hrang fankualpui an nih hnuah nizan khan Dimapur (Nagaland) panin an chhuak leh a ni.