MSPMC ten District 3-a hmasawnna hnathawh enfiah

Mizoram State Project Monitoring Committe Inspection Team te chuan tunkar chhung khan Mamit, Kolasib leh Champhai District tlawhin hmasawnna hnathawh hrang hrangte an enfiah.

MSPMC Team te hian tunkar Nilaini leh Ningani khan Mamit District tlawhin Mamit-a NH-44 A Junction atanga GSA Playground panna kawng siam mek te, Mizoram leh Tripura inrini Kanhmun-a Langkaih lui-a Lei dawh hna thawh mek te, Bairable atanga Zamuang Road siamthat hna thawh mek te, Bairabi to Zamuang Road-a Teirei lui-a Lei dawh mek leh Meidum leh Hortoki inkar kawng siam mek te chu a hmunah an enfiah a. Heng hnathawh hrang hrangah hian hnathawh kallai ti bahlah thei harsatna hrang hrangte sutkian dan tur rawtna te sawiho a ni a. MSPMC Inspecting Team-te bakah Executing Department hotute, Contractor-te leh a project awmna area Village Council leh NGO hruaitute nen heng hnathawh kal mek hi a rang thei ang bera zawh a nih a, quality tha taka zawh a nih ngei theih dan tur hrang hrangte sawiin Pre-Visit & Post-Visit discussion an neihpui bawk a. Heng hmasawnna hnathawh thenkhat phei chu Contractor-te hnathawh tha tawk lo leh muangchan avanga tih khawtlaite pawh a awm a. Chung chu Sawrkar leh mipui duh dan ang ngeia thawh zawh thuai a nih ngei theih nan chak lehzuala kalpui dan tur hrang hrangte contractor-te hi hrilh an ni.

MSPMC Inspection Team te hian Ningani khan Champhai khawpui chhunga building leh a kaihhnawih 6 sak mek tlawhin a sakna tura bungraw hman a that leh that loh test result an enfiah bakah bungraw mamawh chhekkhawl dan te an enfiah nghal a. A saktute chu bungraw mamawhte fur ruahtui tlak hmaa lakhawl turin an chah a ni. Hmalakna an tlawh zinga mi cheng vbc. 13.66 senga Working Women Hostel sak tur chu a hmunah buaina a awm avang leh Hall hlui thiah a nih avangin a hun taka hna thawh theih a nih loh thu te, tunah ban khur laiin ban a tun mai theih tura peihfel a nih thu te tarlan a ni.

Kum 2023 a sak tan leh nikum September thlaa zawhfel tawh tur Hostel for ST Girls chu Fund kalna, Article 275 atangin nikum Working Season tawp rual velin Fund rawn kal a awm theih loh avangin chawlhsan a nih thu tarlan a ni a, Champhai Bethel Veng a Auditorium, DoNER atanga cheng vbc. 12.95 senga sak mek chu kumin December thlaa zawhfel hman beisei a nih thu te, Champhai District Hospital-a Critical Care Block sak mek chu zaa 91 zawhfel a nih tawh thu te, cheng vbc. 38.79 senga Champhai District Court Complex sak pawh hna zaa 73 vel zawh a nih tawh thu leh District Jail thawmthat hna, SASCI atanga cheng vbc. 8.26 senga thawh mek chu za zela 30 vel zawhfel a nih tawh thu te tarlan a ni bawk.