National Defence College atanga kal ten CM an kawm

Ministry of Defence hnuaia awm, National Defence College-a intuaihriam mek India leh ramdang Sipai Officers Mizoram tlawha rawn zin te chu nimin khan Chief Minister Lalduhoma chuan a Pisa-ah a kawm.

He inkawmna ah hian Chief Minister chuan Understanding India Study Tour neia Mizoram tlawha lo zin Sipai Officer te hi lawmthu hrilhin, Mizoram chu State ralmuang, ziak leh chhiar thiam vekna, eirukna tlemna, khualzin ten nasa taka an tlawh mek a nih thu a hrilh a. Aizawl chu lirthei tam hle mah se khawpui reh riai mai a nih thu leh hmeichhia leh naupangte tan pawha khawpui ralmuang tawk tak a nih thu a sawi a, "In kal velnaah kawng sirah Nghahloh Dawr in hmuin ka ring a. Nghahloh Dawr hian kan ram ralmuanzia a tilang ve a ni," a ti bawk.

Heng bakah hian Digital Governance lama India rama hmahruaitu nih tuma sawrkarin ke a pen mek dan te, kum 2047-a India GDP a 1% thawh phak ve tuma Mizoram sawrkarin hmathlir a neih thute leh hriat duh dang an neihte Chief Minister hian a hrilh a. An cham chhunga hun nuam tak hmang turin duhsakna a hlan a ni.

Mizoram tlawhtu Sipai Officer-te hian Mizoram an hmuh dan Chief Minister hnenah sawiin, zawhna an neihte an zawt bawk a. Ram mawi tak a nih bakah a ralmuang a, mipuite an nelawm a, Mizoram hian tlawhtu a la ngah deuh deuh dawn niin an sawi bawk.

NDC course kal laite hi Brigadiers leh Jt. Secretary tlukpui Army, Navy leh Air Force a mi te, India thian tha ram thenkhat (Friendly Foreign Countries) atanga rawn kal sipai officer te an ni a. AMV MV Patel, VM, SDS (Air), Faculty Incharge, NDC chuan a rawn kalpui a. An cham chhungin Mizoram sawrkar hotulute an kawm anga, hmun thenkhat tlawhin sawrkar hmalakna hrang hrangte an zir tawh bawk a ni.