Sports Minister in a hawng

Sports & Youth Services Department changtu Minister Lalnghinglova Hmar chuan nimin khan Mamit-a Multipurpose Indoor Stadium leh Girls Hostel bakah Damparengpui, Mamit chu Khuallian niin a hawng.

He hunah hian Sports Minister chuan Mamit mipuite mamawh leh hlut tur hawnna hun a hmang thei chu lawmawm a tih thu sawiin, Mamit Bialtu MLA in theihtawpa hma a lo lak tawhna chu fakawm a tih thu a sawi a. He hunah hian Mamit Bialtu MLA Er. H. Lalzirliana pawhin he Multipurpose Indoor Stadium din theihna atana hmalatu te hnenah lawmthu a sawi a, State leh National Level a chhuak thei tur Mamit thalai chherchhuah a nih a beisei thu a sawi bawk.

Sports Minister chuan India ramin kum 2036-ah Olympics thlen tumin hma a la mek tih sawiin, Mizote kan lan ve theih nan nasa takin hmasawn kan la mamawh thu a sawi a, infrastructure tha tak tak ngah lam ni lovin Human Resource development-ah tanlak kan ngaih thu a sawi. National Level leh International Level thlenga Mizo ten Medal kan lak theih nan nasa takin hma an lak thu pawh Minister chuan sawiin, Sawrkar flagship program Bana Kaih hnuaiah- Empowering Mizoram Sports chu kalpui niin naupang talent nei tha te zawnchhuah tum a nih thu leh Trainer te pek tum niin Sports discipline hrang hrang - Wrestling, Weightlifting, Volleyball, Taekwondo, Hockey, Archery, Badminton leh a dangte ah hmasawn tum a nih thu a sawi bawk.

Mamit Multipurpose Indoor Stadium hi SEDP leh SASCI atanga sum hmuh cheng nuai 1250 senga sak niin April 12, 2021 khan sak tan a ni a, nikum June 10 khan sak zawh niin a building hi a dung meter 50 leh a vang meter 30 a zau a ni a, Mizopa chhiara chhawng thum niin Basement Floor, Ground Floor, First Floor leh Gallery Level te a awm a ni. A sak hna hi M/S Mizoram Development Agency, Mission Veng Aizawl ten an thawk a ni.