Lengpui ram IAF te lei chungchang chhui turin CBI leh Lok Ayukta-ah ngenna thlen a ni

Indian Air Force (IAF) tana Lengpui ram lei chungchang CBI chhui phutin nimin khan MNF Legal Board leh Congress Party chuan chhuitir tura ngenna an thehlut a, hemi hmalam hian Mizoram Lok Ayukta-ah chhui tura ngenna thehluh niin ZPM Party pawhin Vawiin hian CBI-ah ngenna thlen an tum nia thudawn a ni bawk.

Tunhnaia sawi zui hlawh tak IAF tana Lengpui ram lei chungchang ah hian MNF Party chuan nimin chawhma lam khan Chief Secretary leh Chief Vigilance Officer, Khilli Ram Meena hnenah CBI chhuitir tura ngenna an thehlut a, an Vice Chairman Lalpianfela Chawngthu hminga lehkha an thehluh ah hian MNF Legal Board chuan IAF tana Lengpui rama mimal ram lak danah thil felhlel bakah tun sawrkara thuneitu sang te'n pawisa tam tham tak an eiru a puhin CBI chhuitir ngei tura an phut thu a tarlang a. CBI kher chhui an ngiatna chhan sawifiahin, he thilah hian Chief Minister, Revenue Minister, sawrkar Officer lian leh politics a thiltithei mimal engemaw zat an inhnamhnawih ni a puhna a awm avangin Mizoram sawrkar hnuaia thawkte chhui mai chi ni lova an ngaih thu pawh lehkha thehluh ah hian an tarlang bawk a ni.

Hetihlai hian Mizoram Pradesh Congress Committee (MPCC) chuan nimin chawhnu khan IAF-te hnena Lengpui leh Sihphir ram hralh danah thil fel lo a awma an hriat avangin CBI, Aizawl Unit-ah MPCC Action Committee Secretary Lalhmachhuana leh MPCC General Secretary C. Dothansanga-te hmingin FIR an thehlut bawk a, ZPM sawrkar chu an sawi ang ngeia CBI hnenah General Consent pe tura an ngen thu an sawi bawk.

Hemi hma niminpiah khan Durtlang a cheng Vanlalruata Sailo chuan Lengpui ram hralh chungchang hi chhui turin Mizoram Lok Ayukta ah ngenna a thehlut a, Lok Ayukta chuan lo pawm sakin, Inquiry Team hnuaiah Preliminary Inquiry ti tura hmalak nghal ni a thudawn a ni bawk.

Thudawn danin ZPM Party chuan hemi chungchang ah hian mipui ten thudik an hriat theih nana chhuichiang tura ngenna Vawiin hian CBI ah thehluh an tum bawk a ni.