MUHCS-a sum hmuh cheng vbc. 154 vel niin Bill atan cheng vbc. 126 vel pekchhuah a ni tawh

Sawrkar kum kal mekah Mizoram Universal Health Care Scheme (MUHCS) atana cheng vbc. 154 hmuh ni tawhin damlo enkawlna Bill pekchhuah cheng vbc. 126 a tling tawh.

Mizoram Universal Health Care Scheme (MUHCS) thuneitu sang, Governing Body chu nimin khan an Chairman leh Chief Minister Lalduhoma hovin CM Conference Hall-ah thukhawmin MUHCS kalpui chungchang an thlirho a, he huna tarlan a nih danin MUHCS-ah hian chhungkaw 20,198-a mihring 80,792, Pensioner chhungkaw 10,236-a mihring 40,944, Sawkar hnathawk chhungkaw 35,325-a mihring 1,41,300 leh AB PMJAY chhungkaw 2,22,943-a mihring 8,91,772 awmin, a vaiin chhungkaw 2,88,702, mihringa mi 11,54,808 te chu an inziaklut a. Tun kum kal meka MUHCS atana Fund hmuh tawh zawng zawng chu cheng vbc. 154 vel a ni a, la hmuh tur cheng vbc. 48 vel a la awm a. Damlo bill endik tawh 83,682 niin bill pek chhuah tawh chu cheng vbc. 126 vel a ni a. Bill endik tur cheng vbc. 38 vel la awmin endik thuai a ni dawn a. Tun kum kal mekah chhungkaw inziaklut zawng zawng atanga chhuta za zela sawmhnih pakua (29 %) ten Medical bill an thehlut a, chu chu mihring inziaklut zat atanga chhutin za zela pasarih (7%) an ni a. Mi pakhat hnena bill pek zat (approved) hi chawhrualin (Avarage Payout per Patient) Rs. 15,106 a ni.

MUHCS kalpui a nih hnuah hian sawrkar damdawi In pantu puang nasa in Bill endik tawh za zela sawmsarih (70%) chu sawrkar Hospital-a lut a ni a. Sawrkar Hospital-a lutte hi tam zawk mahse an Bill erawh chu bill pawm tawh zawng zawng atanga zaa sawmthum pakua (39%) a ni thung a. Private Hospital pantute Bill a san bik chhan hi natna serious bik, Thluak zai, Thin thlak leh Kal thlak ang chite an nih thin vang a ni tlangpui a. Hei vang hian sawrkar Hospital te thuamchak zel a tul hle ngaih a ni. Sawrkar Hospital leh Empanelled Hospital-a enkawl theih natnate chu a theih chin chinah Non-Empanelled Private Hospital-a refer loh nise an ti a. Non-Empanelled Hospital-a enkawl tura refer theihna dan Emergency/Life Threatening Situation pawh a natna kalpui theih chin chiang lehzuala sawifiah tura tih a ni. “Sawrkar hian Empanelled Hospital-te hnenah ni 30 chhungin Bill a pechhuak thin ang,” tia dan siam a nih laiin sum leh pai dinhmun a that avangin kartin pawisa hi an pechhuak thin a, hei vang hian Empanelled Hospital-te tan harsatna engmah a awm rih lova ngaih a ni.

MUHCS hi sawrkar pawisa kum mila kalpui niin pawisa kum thar atanga chak zawka kalpui a nih theih nan nimin-a thukhawm hian ruahmanna an siam a. Committee tihtlem pawh tha an tih angin Core Committee chu tihbo tawh tur a ni a. A kalphung tur dangte pawh siamrem hlek hlek niin chung zingah chuan damdawi man tlawm taka lei theihna tur Pharma Depot din tura hmalak leh Subscription-a Double beneficiary awm palh thei laka invenna siam te an tel a ni.