Bana Kaih Scheme hnuaiah Loan cheng vbc. 34.038 pe tawhin mi 2713 te CM Special Package pe tawh

Bana Kaih Scheme hnuaiah February ni 10, 2026 thleng khan chhungkaw 384 hnenah loan cheng vbc. 34.038 pekchhuah a ni tawh a, CM Special Package hnuaia pawh Progress Partner thlanchhuah mi 2713 hnenah cheng vbc. 22.625 pekchhuah a ni tawh bawk.

Mizoram Sawrkar Flagship programme ‘Bana Kaih Scheme’ hnuaia Chief Minister’s Special Package semchhuahna hun leh Bana Kaih Scheme hnuaia Loan la ten a pung an lo rulh tawh pek letna hun chu nimin khan Aizawl-a I&PR Office-a Lianchhiari Run Mini Theatre-ah neih a ni a, he hunah hian Handholding Scheme-a CEO, Lalfakzuala chuan an hmalak tawhna tarlangin, Bana Kaih Scheme kaltlangin February ni 10, 2026 thleng khan chhungkaw 384 hnenah loan pekchhuah ni tawhin sum pekchhuah pawh cheng vbc. 34.038 (Rs. 34,0389,928) a tling tawh a. Loan rul thate, an loan punna (Interest) chu Sawrkarin thla ruk (6) danah a pek sak dawn a, thla ruk dana a punna hmasa ber Cheng nuai 15.921 (Rs. 15,92,138) chu nimin khan loan pechhuaktu Bank kutah pek a ni . Handholding Scheme CEO chuan Bana Kaih Scheme Phase-I hnuaia loan hmu tur thlan tawhte bakah hian Phase-II hnuaia loan hmu tur chhungkaw 147 thlan a nih leh tawh thu a sawi bawk. Hei bakah hian nimin thleng khan Bana Kaih Scheme CM Special Package hnuaia Progress Partner thlanchhuah mi 2713 hnenah cheng vbc. 22.625 (Rs. 22,62,51,870) pekchhuah a ni tawh bawk a. Phase-II hnuaia chhungkaw 458 hnena pek tur cheng vbc. 2.289 (Rs. 2,28,93,500) chu nimin khan tihchhuah a ni a. Phase-II kalpui leh hnu hian Progress Partner 917 thlan a nih tawh thu a tarlang bawk.

Nimin-a he hun hman hi Adviser to Chief Minister (Implementation of Handholding Policy) Dr. KC. Lalmalsawmzauva chuan khuallian nia hmanpuiin Bana Kaih Scheme chu Mizoram tihmasawn tura thiamna leh theihna nei, mi taima leh hlawhtlin tum tlat mite zawnchhuah a, eizawnna ngelnghet an neih theihna tura tanpuina pek a nih thu a sawi a. Hlawhtlin ngei tumte chauh thlanchhuah an nih theih nan Sawrkar Department hrang hranga thawktute pawhin dilna lut thlitfim leh vil zui hna uluk takin an kalpui thin thu sawiin, Bana Kaih Scheme hnuaia Progress Partner ni tura thlanchhuah zingah loan rul tha lo an awm hriat a nih loh thu a sawi a. Bana Kaih Scheme hlawhtlin nana thawktu pawimawh tak takte chu Sawrkar Department, a thawhpui Bank-te leh Progress Partner ni tura thlanchhuahte an nih thu sawiin, Progress Partner ni tura thlanchhuah ten a hun taka loan an hmuh theih nana Bank-a thawktute inpekna chu fakawm a tih thu a sawi a. Mipui nena indawrtawnna hmun pawimawh tak a nih angin Bank-a thawktute chu dawr nuam, hmel hmuh nuam leh dawhtheihna nena Bank dawrtute lo chhawn chhunzawm zel turin a fuih bawk.

Adviser to Chief Minister (Implementation of Handholding Policy) chuan Bana Kaih Scheme hnuaia CM Special Package dawngtu zinga hma la tha thlanchhuah a nih tur thu leh chungte hnenah chuan lawmman buatsaih a nih tur thu a sawi a. March thla chhung hian Mizoram District tinah Bana Kiah Scheme Awareness Campaign buatsaih a nih tur thu a sawi bawk bawk.

He hun kaihruaitu Principal Adviser, Dr. Lalrinchhana chuan Progress Partner ni tura dilna thehluh hnuah a changtu Department-a thawktuten uluk taka an endik dan te, a thlawn a sem a nih loh mai bakah tha taka loan rulh a tul thu te leh a rul thate chauh Sawrkarin loan pung a pek kir leh tur thu te a sawi bawk.

Nimin-a Lianchhiari Run Mini Theatre-a Bana Kaih Scheme hnuaia CM Special Package leh Loan Interest Subvention sem chhuahna hunah hian Bana Kaih Scheme hnuaia tanpuina dawngtute hlawhtlinna leh hmalakna video tawi thlirhona neih a ni bawk.