Lawngtlai AOC veng-a mi thihna ah hmalak zel tum

Lawngtlai District Bawrhsap Donny Lalruatsanga chuan Lawngtlai AOC Veng-a cheng Lalramsanga thihna chungchang ah thilsual titu te chu ramdang mi ni mah se hremna pek ngei an nih theihna tura hmalak a nih tur thu a sawi.

Niminpiah-a ruang an chhar tak Lalramsanga thihna chungchang ah hian nimin khan Lawngtlai Bawrhsap Donny Lalruatsanga, Lawngtlai Superintendent of Police PC. Lalchunglura leh Central YLA President F. Lalrothanga te chuan Lawngtlai DC Office Chamber-ah Chanchinbu mite kawmin he hunah hian Bawrhsap chuan Lawngtlai AOC Veng-a cheng Lalramsanga thihna avangin hmalakna kawng hrang hrang kalpui mek a nih thu leh thil sual titute chu 'foreigner' nimahse hremna pek ngei an nih theihna tura hmalak a nih tur thu a sawi a. Lalramsanga leh a thiante hi February ni 11, 2026 khan Myanmar ram Salachhuah-a bungraw dah tura kalin, February ni 12 zan dar 9:00 atang khan a chanchin hriat tur a awm tak loh thu a sawi a a ni.

Lawngtlai SP PC. Lalchunglura sawi danin February 15, 2026 chawhnu dar 3:00 velah Salachhuah leh Chhimtuipui infinnaah Lalramsanga ruang hmuh niin Police lamah FIR thehluh a nih tawh thu tarlangin, thubuai ziahluh a nih thu leh Phura Police Station-ah transfer leh a nih tur thu a sawi a. SP chuan a chhuina chak taka kalpui a nih tur thu sawiin, Murder Case-a kalpui a nih tur thu a sawi a. CYLA leh MTP-te nen thawhhona tha tak a awm tih sawiin, pawi khawihtute chhuichhuaha hremna pe tura hmalak tum a nih thu a tarlang bawk.

Lawngtlai Bawrhsap chuan thihna hial a thleng chu pawi a tih thu sawiin, thupek khauh zawk chhuah a nih tur thu leh thla hnih (2) chhung atan ramri pawh khar a nih tur thu a sawi a. Lawngtlai mipuite chi-ai lo tura chahin, chak taka hmalak zel a nih tur thu leh CYLA, MTP leh LDPA-te nen thawhhona tha tak awmin, District Administration nen inrawntlan reng a nih thu a sawi bawk.

Central YLA President F. Lalrothanga pawhin he thil thleng ah hian theihtawp an chhuah mek thu sawiin, MTP General Headquarters te nen pawh thutkhawm neih niin Press Release pawh chhuah a nih thu a sawi a. Lalramsanga a bo tih hriat atang khan theihtawpa a zawn hna thawh nghal niin, Arakan Army-te nen pawh inbiakna neih a nih thu leh CYLA anga chak taka hmalak zel a nih tur thu sawiin, District Administration hmalakna an thlawp tlat thu a sawi bawk.

Burma ram Salachhuah-a Bungraw dah-a kal kum 37-a upa Lalramsanga hi February 12 atanga a chin hriat a nih loh hnuah Pathianni khan Salalui leh Chhimtuipui infinna lai, India leh Myanmar ramrilui ah a ruang hmuh a ni a, nimin zing khan a ruang hi Lawngtlai thlenpui niin Postmortem a nih hnuah Melbuk-ah vui tura ruahman a ni.