MUHCS atan cheng vbc. 126.39 pechhuak tawh

Mizoram sawrkar chuan niminpiah khan Mizoram Universal Healthcare Scheme (MUHCS) kalpuitu damdawi In te hnenah damlo enkawlna senso rulh nan cheng vbc. 9.99 a pechhuak leh a; heti hian sawrkar kum kal mekah MUHCS kaltlangin MUHCS zawmtu damdawi In te hnenah damlo 83,680 enkawlna senso rulh nan cheng vbc. 126.39 a pe tawh a ni.

Mizoram State Healthcare Society (MSHCS)-in a tarlan danin, sawrkar kum kal mekah nikum (2025) April thla atanga niminpiah, February ni 9 thleng khan Mizoram sawrkar chuan MUHCS zawmtu damdawi In hrang hrang hnenah damlo enkawlna senso rulh nan tum 58 zet pawisa a pechhuak tawh a, pawisa a pek chhuah tawh zawng zawng hi cheng vbc. 126.39 niin damlo 83,680-te enkawlna senso a ni. 

MUHCS hi Mizoram-a sawrkar damdawi In zawng zawng bakah mimal leh Kohhran enkawl damdawi In 16 leh Private Day-Care Centre pathumin an zawm tawh a; Mizoram páwnah MUHCS Empanelled Hospital 33 leh MUHCS Deemed Empanelled Hospital 12 a awm mek bawk a. Serchhip District bikah Private Hospital awmchhun, Mercy Hospital pawhin MUHCS hi zawm tawhin sawrkar damdawi In zawng zawng nen MUHCS hi hman theih a ni tawh a ni.

Sawrkar kum kal mek atan MUHCS-ah hian sawrkar hnathawk nghet leh a nghet lo chhungkua 36,324 ziahluh an ni a; heng bakah hian Civil Pensioner chhungkaw 8,733, Golden Card nei chhungkaw 2,22,943 leh pawisa senga inziaklut chhungkaw 20,213 an awm mek bawk a ni.