Larsap-in Aizawl-ah 'LESDE Kût 2026' hawngin 'Eizawnna Kailawn' leh 'Rahbi Chhertu' a tlangzarh

Tun thla ni 14 thleng awh tur 'LESDE Kût 2026' chu nimin khan Aizawl Lammual-ah neih tan niin he hun hmanpuitu Mizoram Larsap General (Dr) Vijay Kumar Singh chuan Mizoram Building and Other Construction Workers Welfare Board (MBOCWWB) hnuaia project kalpui tur 'Eizawnna Kailawn' leh 'Rahbi Chhertu' a tlangzarh bawk.

Labour, Employment, Skill Development & Entrepreneurship Department buatsaih 'LESDE Kût 2026' hawnna ah hian Larsap chuan LESDE Kût buatsaih tura Minister leh tha thawhtu zawng zawngte inpekna fakawm a tih thu sawiin, sum lei pai hmasawnna chu eizawnna thar siam chhuah zat ah te, thalai chherchhuah tamah te, Entrepreneur chawikan tamah te, hmeichhia leh thingtlang mite tel tam lamah te a innghah thu a sawi a. Micro, Small and Medium Enterprises (MSME) Sector chu ram thanna atana pawimawh tak a nih thu sawiin, India ram chu MSME Sector-ah khawvel hriat hlawh leh thangchak berte zinga mi a nih thu leh ram dangte entawn leh zirchian chak a ni, a ti a. MSME hmalakna chu thingtlang kilkhawr thleng phaka kalpui a tul thu a sawi bawk.

He hunah hian LESDE Minister Lalnghing-lova Hmar chu khual zahawm niin Director John Tanpuia chuan LEDSE Kût an buatsaih chhan leh an tum te a tarlang bawk a ni.

LESDE Kût-ah hian LESDE Department leh a kaihhnawih Board leh Institution hnuaia Service, programme leh hlawhtlinna te phochhuah a ni a. Thalai, MSME, Entrepreneur, hna zawng mek, hnathawktu leh anmahni kaihruai theitu turte chu a kaihhnawih peng hrang hrangte nen thlun-zawmin, hna, thiamthil leh hamthatna dangte hre chiang turin hun tha a siam sak a ni. Made in India leh Atmanirbhar Bharat chawilarna niin, State leh Regional Level Trade Fair kaltlangin thil siam hrang hrang phochhuah a ni a. Micro and Small Enterprises (MSEs) nen tangkawpin Mizoram leh North Eastern Region-a entrepreneur-te Sawrkar laipui hnuaia Ministry leh Mizoram Sawrkar Department hrang hrangte nen a thlunzawm bawk.