Sahuan atangin 8 bo tawh

Kum 2020 leh 2025 inkar chhungin Aizawl Sahuan atangin ramsa leh sava bo 8 an awm tawh a. Ramsa/sava bo thubuai ah hian Sairang Police Station-ah FIR thehluh a ni a, a mawhphurtu man an la awm lo thung.

Zalen RTI zawhna SPIO, Aizawl Wildlife Division chhanna atanga a lan danin Sahuan atanga Ramsa leh Sava bo te chu Fischer's lovebirds (Orange Beak), Blue and gold Macaw Bird, Flame Powerbird, Red faced Spider Monkey, Indri Lemur, Rufous Hornbill, Lears Macaw leh Pesquet Parrot te an ni a. Ramsa/sava bo zingah hmuhchhuah an la awm lova, zawn mek pakhat a la awm tih an sawi ni.

Aizawl Wildlife Division SPIO chuan ramsa/sava bo chungchangah hian Sairang Police Station ah FIR thehluh a niin mawhphurtu man an awm lo a, CID leh Mizoram Police 3rd MAP Battalion te Sniffer Dog hmang in zawn an nih thu leh AMC Surveillance in chhui zui a ni tih a sawi a. Ramsa/sava te bo hun chu Fischer's lovebirds (Orange Beak) ni 10.12.2021 ah, Blue and gold Macaw Bird hi ni 01.03.2021, Flame Powerbird ni 12.02.2022, Red faced Spider Monkey leh Indri Lemur te ni 11.04.2022, Rufous Hornbill leh Lear's Macaw te ni 07.03.2023 bakah Pesquet Parrot hi ni 29.10.2025-ah te an bo tih a sawi bawk a. Ramsa/sava bo te hi mut reh lai, zing dar 1:00 atanga dar 4:00 inkar vela bo nia hriat a niin sahuan chhungah an awmna tur bika siam, chumi chhunga mi chu a bang net kar chhiain a chhungah an lut a, an man ni a hriat a ni, tih a tarlang bawk.

SPIO chuan kum 2020 atanga 2025 inkar chhungin Myanmar leh State dang atanga ramsa leh sava tawlhruk 1094 a awm tih sawiin, heng ramsa leh sava tawlhruk kaihhnawihah hian kum 2025 chhungin Cham-phai Division-ah mi 8 man an ni tih a sawi bawk. Aizawl Sahuan-ah hian Ramsa 171 leh Sava 8 an awm mek a, hetah hian exotic animal chhiar tel a ni lo thung a ni.