MNF in AMC Inthlana an Candidate tur an puang

MNF Party chuan Aizawl Municipal Corporation (AMC) Inthlanpui lo awm tura an party Candidate tur puanna Inkhawm nimin khan neiin AMC Bial 19-a an Candidate tur puanchhuah an ni.

Aizawl Vanapa Hall-a hemi puala hun hman hi AMC Campaign Committee Treasurer, Lal-ruatkima chuan kaihruaiin MNF President Zoramthanga chuan an Candidate turte hi puangin, “MNF Candidate kan puan tawh zawng zawngah a chhuanawm ber pawl an la ni tlangin ka hria. An Ward theuh mipuite an vote hlu tak lo hlan theuh turin ka ngen a. Pathian leh mipui zarah hnehna kan chan ngei ka beisei a ni,” a ti a. “ZPM sawrkar hi Zoram mipuiin an kham ta hle. Sinlung Hills inthlanah an tla a, VC/LC inthlanah an che tha lo a, Dampa Bial-ah ruling an tla leh a, Lai District inthlanah MNF pakhatna kan ni a, Ruling pathumna an ni. Mipuiin enchhin party an kham der tawh tih a chiang hle,” a ti bawk.

Lengpui ram Airforce hnena hralh to a ni lutuk chu mak a tih thu pawh MNF President chuan sawiin, “Hman atangin Airforce hian ram lei tur Congress leh MNF hunah pawh khan an zawng a. A tha alawm, a thuphungin kan ti. An tih tak takna erawh chu May ni 15, 2025 khan Preliminary notification a chhuak ta a. An ram lei tur ZPM sawrkar-in a zawng a, bul an tan ta tak tak a ni. Social Impact Assestment, Danin neih ngei ngei tur a tih kha nei ta lovin, Revenue Minister khan a tul love, a tiin a cancel hmak mai a ni. Parliament dan siam ZPM Minister pakhatin ‘a tul lo’ lo tih ve ngawt tur a ni lo,” a ti a. “Kha ram lei danah khan dan bawhchhiatna a nasa hle a. Dan lam an ngaihtuah tawh lo, sum ei ringawt kha an ngaihtuah a ni. CBI-in a la chhui ang a an buai khawp ang. Khatiang titute kha AMC-ah rorelna kan pe leh ang em?” tiin zawhna a siam bawk a ni.