C&I Minister in MadeByMizo.com a tlangzarh

Mizote siamchhuah leh kutchhuak thil chi hrang hrang zawrhna website MadeByMizo.com chu nimin khan Commerce & Industries Department changtu Minister F. Rodingliana chuan a tlangzarh.

Raising and Accelerating MSME Performance (RAMP) MZ4 Marketing Intervention hmalaknaa siam Mizote siamchhuah leh kutchhuak thil chi hrang hrang zawrhna website MadeByMizo.com hi Mizo thil siam hrang hrangte quality tha bik, mumal taka thlanchhuahte pholanna leh State pawnlam market-a thawnchhuahna platform a ni a. Mizo kutchhuak leh Mizoram raw material ngei hmanga thil siamchauh pholan a ni a. Raw material lakna, thil siamna hmun leh a siamtute chungchang chhui zui theih chu ngaih pawimawh niin Website-ah hian thil siamte chu category hrang hrang – ei leh in, thawmhnaw, hriselna kaihnawih, handicraft leh a dangte-a thliarhran an ni.

MadeByMizo.com hi Open Marketplace a ni lova, platform-a tel ve duh business-te tan Instagram-a madebymizo page-ah Direct Message a thawn theih a. Platform-a tel ve thei chinte tan chuan an thilsiamte zawrhna tur zau zawk, Mizoram pawn State dangte thlengin siamsak an ni dawn a. MadeByMizo Kiosk Bangalore, Kolkata leh Delhi-ah te din tur niin chutah chuan Mizo product thlanchhuahte chu pholan an ni ang.

MadeByMizo.com tlangzarhna hunah hian Commerce & Industries Minister F. Rodingliana chuan Mizote hi IT platform hmangin sumdawng ve tawh mahila a leitu leh hralhtute tana platform rintlak, belhchian dawl erawh kan la neih loh thu a sawi a. Tunah chuan rampawn lama leitute pawhin an rinngam theih tur khawpa e-commerce sumdawnna ruahman a ni ta chu lawmawm a tih thu sawiin, Ramchhung thil siamchhuah leh tharchhuahte hralhna kawnga kan buaina ber thin chu hralhchhuahna tur market nena inzawmna (market linkage) a nih thu a sawi a, chu harsatna chu sukiang turin Mizoram Sorkar Handholding Policy hnuaiah nasa takin hmalak mek zel a nih thu leh he website pawh hi Mizoram sawrkar hmalakna kal mek Handholding Policy nen a inhnerem thlap tih a sawi.

C&I Minister chuan MadeByMizo.com chu website satliah a nih loh thu leh kan entrepreneur leh sumdawng mi, kutkawih thiamna nei leh loneitute tan kawngka hawnsaktu a nih thu a sawi a. He website hmang hian thingtlang kilkhawr ber bera product-te a mamawhtu tan an pawhhnaih dawn thu leh a siamchhuaktu te tan International Market an pawhhnai sak dawn thu a sawi bawk.

Website tlangzarhna inkhawm hi ZOHANDCO Managing Director LP. Lalchangkima chuan kaihruaiin. Khualzahawm ZOHANDCO Chairman JK. Dawngzuala pawhin Mizote tana an thil siamte phochhuahna tur leh hralhna tur siam a ni chu lawmawm a tih thu a sawi bawk.