MJA (SD) Annual Conferece hmangin hruaitu thlanna nei

Mizoram Journalists’ Association (MJA) Serchhip District chuan Zirtawpni kalta khan Annual Conference vawi 26-na hmangin hruaitu thlanna an nei.
Serchhip Press Club-a MJA (SD) Annual Conference hi I&PR Department Deputy Director Andrew H. Lalremruata chuan khuallian nia hmanpuiin tunlai khawvelah Print Media hi a tlahniam chho deuhin lang mahse chanchinbu chu a ral mai dawn loh thu sawiin, tunlai technology thang chho zel karah tan la zel turin Serchhipa chanchinbu mite a fuih a. Tunlai mipui bengvar tawh takah hian MJA Member te chuan Journalist Ethics hre reng tur leh an zahawmna vawng tlat tura fuihin, Serchhip District MJA te an kal zelna turah duhsakna a hlan bawk.

MJA (SD) Vice President Kapliana Pachuau kaihhruai he hun hi Serchhip DRDO Project Director Dr. Malsawmtluanga Fanchun pawhin khual zahawm nia hmanpuiin Democracy ramah chuan Journalist ten mawhphurhna thuk tak an neih thu te, thudik hrula information diklo avangin mipuiten ngaihdan dik lo an put theih thu te, IT hmasawnna avangin Media-ah thil inthlakthleng tam tak a awm tawh avanga a tul anga inherrem thiam ve zel tura MJA Member te fuihin, an pawimawhna leh mawhphurhna hre reng a, an zahawmna vawng nung thiam reng turin a chah bawk.

MJA Serchhip District Annual Conference ah hian an President C. Lalhminghlua bakah MJA General Hqrs. atanga rawn kal ten thu an sawi a, Report hrang hrang ngaihthlak a ni bawk. Chawhnu lamah Rorel Inkhawm neiin kum 2026-2028 chhunga an pawl hruaitu tur thlanna neih a ni a, President-ah Kapliana Pachuau (Serchhip Times); Vice President-ah Lalremruata Ralte (Ramlai Arsi) leh Treasurer-ah Zonunsanga Kawlni (Lenkawl) te thlan an ni a, Executive Member-ah mi 5- H. Lalbiakzauvi, C. Lalrochhuanga, T. Biakchamliana, Lawmhlira Ralte leh R. Lalmuansanga te thlan an ni bawk.