Vawiin atangin Sawhthing lei tan leh a ni dawn; Beisei anga chhang an la awm meuh lo

Kumin (2026) atan Vawiin February 2, 2026 atang hian Mizoram Sawrkarin Mizoram Agricultural Marketing Board (MAMB) kaltlangin Sawhthing a lei tan dawn ta a, hemi chungchang ngaihtuah hian Serchhip District Agriculture Marketing Committee (DAMC) chuan nimin khan Bawrhsap hovin Video Conference hmangin meeting an nei.

Mizoram Agricultural Marketing Board (MAMB) chuan ruahmanna a lo siam tawh angin kuthnathawktute tharchhuah Sawhthing chu Vawiin atang hian a lei tan leh dawn a, hemi chungchanga MAMB thuchhuah lo siam tawhin a tarlan danin SCC kaltlanga Sawhthing support price dawng thei tura hralh theih hun chhung hi February ni 2 atanga May ni 30, 2026 inkar a ni anga, Primary Collection Centre (PCC) hriatpuina lehkha neilo te chu SCC-ah Sawhthing hralh phal an ni dawn lo a, Sawhthing support price dawn beisei lo te chuan an duhdan ang leh tha an tih angin engtiklai pawhin an tiral thei reng dawn a ni. Sawhthing chu thil chhe hma tak a nih avangin DAMC-in hriattirna a pek hma chuan lo chawh lawk loh tur a nih thu MAMB chuan sawiin, PCC-ten SCC-ah Sawhthing quality tha chauh dahluh tur a nih thu leh Sawhthing tha lo dahte chuan Support price an beisei thei lo ang tih an sawi a. Sawhthing hralhtu tur ten anmahni hminga Bank Account neih vek tur a nih thu leh midang account hman phal a nih loh thu an tarlang a ni.

Serchhip District-ah chuan kumin hian Secondary Collection Centre (SCC) pariat (8) a awm dawn a, heng te hi Chhingchhip, Chhiahtlang, Thenzawl, Khawlailung, North Vanlaiphai, East Lungdar, Mualcheng leh Lungpho te niin SCC tin tan hian Supervisor ruat an nih bakah a enkawltu tur Co-Ordinator ruat an ni bawk a. Hemi atana inbuatsaihna thlir hian nimin khan Serchhip District Agriculture Marketing Committee (DAMC) Member te chuan an Chairman leh Bawrhsap Paul L. Khuma hovinVvideo Conference hmangin Meeting an nei a. He hunah hian SCC tin te inbuatsaihna chungchang ngaihthlak niin Sawhthing buk turin an inpeih fel tawh tih report a ni a. Sawhthing dahna tur Kudam a hman theih em tih te leh Sawhthing lilam tur hriattirna (auction notice) an tichhuak em tih te sawiho niin SCC tinin Auction Notice an tichhuak tawh a. Sum chetvel dan mumal taka ziahluh tur niin Accounts vawn dan turte inhrilhhriat nawn leh a ni bawk.

Supervisor ten PCC leh SCC hruaitute training pe tura beisei an nih angin an hmalak dan tur leh inkaihhruaina pawimawh zawng zawng training an pe fel vek tawh a. Mizoram Agriculture Marketing Board (MAMB) portal https://mizothlaithar.mizoram.gov.in/#/ ah inkaihhruaina bakah SCC leh PCC enkawl dan tur thil thar a hunbi-a dahchhuah thin a nih thu leh ngaihven fo a tul dan te inhrilhhriat a ni bawk.

PCC hrang hrang ten Vawiin atangin SCC-ah Sawhthing an dah tan tawh dawn avangin SCC te chu PCC te berawn chunga an dah hun tur bituka ruahmanna siam tura hriattit an ni a, heng an ruahmanna te hi DC Office-ah submit vek tura hriattir an ni bawk.

Hei bakah hian SCC tina Supervisor ten Sawhthing lut leh chhuak chungchang te, Kudam-a Sawhthing awm zat te, Sawhthing hralh zat te kartin an thehlut thin dawn a, heng te bakah hian Sawhthing dahna tur Mesh bag chungchang te, Service charge te, Audit Team-in SCC tin pawisa an endik thin tur chungchang te, North Vanlaiphai leh Lungpho kawng siam that chungchangte leh pawimawh dangte sawiho a ni bawk.

Tun dinhmunah SCC hrang hrang ten an Sawhthing leikhawm an hralh lehna tura Auction Notice an chhuah ah chhangtu an la tam lutuk lo nia thudawn niin Sawhthing lei tura chhang te pawhin sawrkar in rate a bithliah ang an chhang phak lo nia thudawn a ni bawk.