Mizoram-a IAS awm te kawmngeih turin a chah

Higher & Technical Education Minister Dr. Vanlalthlana chuan MPSC Combined Exam a hlawhtlina chang te chu Mizoram-a IAS awmte kawmngeih a, thawhhona tha tak neih pui turin a chah.

MS Academy, Aizawl chuan an Academy hnuaia zirlai MPSC Combined Exam, 2025-a hlawhtlinna chang mi 14 te lawmpuina hun chu Zirtawpni zan khan Mama’s Heaven Vaivakawn ah hmangin he hun a hmanpuina ah H&TE Minister Dr. Vanlalthlana chuan hlawhtlinna changtute chu ramdang atanga Mizoram-a IAS rawn awm te kawm ngeih tur leh thawhhona tha neih pui tura chahin, an let leh thlenga mi tangkai thei an nih avangin a pawimawh thu a sawi a. Sawrkar hnathawk ni satliah lo a, sawrkar fawng vuantute hnenah rawtna an neih ang te Meeting-na pawh a sawi chhuak ngam ve tur leh uluk taka an lo ngaihthlak tur thu a sawi a ni. 

Education Minister chuan thawkrim leh thiam ngah te chu duhsak pawh an hlawh lo thei lo tih sawiin, chutih laiin mahni invawng zahawm turin hlawhtlinna chang thar te chu a chah a. Khaw-tlang leh Kohhran atangin sum khawn pawh lo awm se mahni income dik tak mila pek mai a that thu a sawi a. Zoramin bung thar kan kai chho mek nia sawiin, “Sawrkar fawng vuantute hian thil kan hre famkim vek lo a, hmasawnna hi official ram hmangaihtu tak tak te vang a ni,” tiin an thawhho thiam a pawimawh thu a sawi bawk.

He hunah hian MYC Chairman Mal-sawmzuala Ralte pawhin MPSC Combined Exam, 2025-a hlawhtlinna chang te chu vanram kaina daltu chu hlawk viau dawnin lang mah se chatuan nun atan a hlawk dawn loh avanga hnawl ngam turin a chah a. Sawrkar hna in mawhphurhna lianpui a ken tel thu leh he hna an thawhna chhan tur ber chu mipuite rawngbawl a nih thu sawiin, “Chuvangin tumah kan rawngbawlsak a te biak hreawm in kan awm tur a ni lo,” tiin a chah bawk.