2nd Aizawl International Half Marathon neih a ni

Inrinni khan ‘2nd Aizawl International Half Marathon’ (AIHM) chu Aizawl Mualpui-a Rajiv Gandhi Stadium-ah neih niin a bul tanna leh a kharna chu Larsap General (Dr) Vijay Kumar Singh chuan a hmanpui a ni.

Mizoram Sawrkar Sports & Youth Services Department leh Innovations India tangkawpin ‘Connecting India, Developing Mizoram, Empowering Sports’ tih thupui hmanga an buatsaih 2nd Aizawl International Half Marathon hi Rajiv Gandhi Stadium-ah bultan niin mi 3000 dawn an tel a, he intlansiak a tel te hi Larsap chuan vailiamin World Bank Road-ah tlanin Silaimual lama an tlan hnuah Rajiv Gandhi Stadium-ah bawk kir lehin a kharna neih zui a ni a, Category hrang hrang 9 - 21.1 km Half Marathon (Men& Women), 10 km Open Race (Men & Women), 5 km Fun Race (Men & Women), 5 km Junior Race (Boys & Girls) leh 5 km Senior/Veteran (above 60 years) Race-ah te then a ni a. India ram hmun hrang hrangte bakah ramdang Kenya, Ethiopia, Bahrain, United Kingdom leh France atangin International Runner 16 an rawn tel a. Lawmman cheng nuai 15 chuang semchhuah a ni.

Larsap General (Dr) Vijay Kumar Singh chuan hlawhtling taka Aizawl International Half Marathon tum hnihna buatsaih a ni chu lawmawm a tih thu sawiin, India ram hmun hrang hrang bakah ram dang atanga rawn tel engemawzat an awm chu fakawm a tih thu a sawi a, “Hei hian AIHM chu khawvel huap a nih zia a lantir a, a than chak zia leh khawvel ang pawha hriat a hlawh zia a lantir a ni,” a ti a. AIHM chu Mizoram mawina leh boruak thianghlim phochhuahna hun remchang a nih thu sawiin, hmun dang atanga lokalte chu khualtha an nih tel thu a sawi a. Mizoram an cham chhunga hun hlimawm tak hmang tura duhsakna hlanin, nakum lamah pawh an thiante, chhungte leh infiammi dangte nen Marathon tlan tur chauh ni lo, Mizoram belchiang tura lokal leh ngei turin a sawm a ni.

Aizawl International Half Marathon tum khatna chu nikum April 26, 2025 khan hlawhtling taka neih niin mi 1500 vel an tel a. He Marathon hi Athletics Federation of India-in a pawmpui bakah Sports Authority of India chuan a thlawp bawk a. Competition a nih mai piah lamah Mizoram rawn tlawhtute tan Mizoram mawina leh kan nunphung phochhuahna remchang a ni a. Khualzin hipna tha a nih avangin Tourism Event Calendar 2026 ah pawh dah tel a ni.

Kumin-a inelna ah hian inelna hautak ber, km 21.1-a thui intlansiak ah Mipa inelna ah Kemboi Kevin Kiprono (Kenya) chu pakhatna niin Rs. 2,00,000 bakah Medal leh Certificate a dawng a, Nafsena Ejeta Balcha (Ethiopia) leh Clinton Kibet Mutai (Kenya) ten an dawt. Hmeichhe inelna ah Renu Singh (Uttar Pradesh, India) chu pakhatna niin Tsige Debay Tadese (Ethiopia) leh Marta Hirpato Yota (Bahrain) ten an dawt bawk.