LESDE Kut 2026 kharna Minister hovin hman a ni

Labour Employment Skill Development & Entrepreneurship (LESDE) Department buatsaiha Aizawl Lammual-a neih ‘LESDE Kut 2026’ chu Inrinni khan zawhfel a ni a, a kharna hun hi LESDE Department changtu Minister Lalnghinglova Hmar chuan khuallian niin a hmanpui a ni.

Aizawl Lammual-a LESDE Kut 2026 kharna hunah hian LESDE Minister chuan LESDE Kut chu kuthnathawkte, thiamthil neite leh hna zawng mekte puala buatsaih a nih thu sawiin, LESDE Department inhmelhriattirna leh sawrkar hnuaia hamthatna hrang hrang an dawn theihte pholanna hun a nih thu a sawi a. LESDE Department chu department lian ni lo mah se Central Ministry 5 – Labour Ministry, Skill Development & Entrepreneurship Ministry, Ministry of External Affairs leh Ministry of Corporate Affairs nen indawrin an thawhho thu a tarlang a. Mizoram pawh entrepreneurship leh thiamthil zir kawngah hma kan sawn viau rualin, thil tha zawk leh danglam zawk ngaihtuah chhuaka siamchhuah tum zel turin kalkhawmte a fuih bawk.

He hun kaihruaitu LESDE Secretary Dr. Lalhriatzuali Ralte chuan kalkhawmte lawmna thu sawiin, Sawrkar chuan India ram mai nilo ram pawn thlenga thalaite hnathawh theihna tur kawng a dap char char thu tarlangin, thalaite chu sawrkarin an hna zawnna leh thiamthil an zir theihna tura hma a lakna hrang hrangte ngaihvena hmang tangkai turin a chah a. LESDE Director John Tanpuia pawhin Report pein LESDE Kut hi February ni 10-ah tan niin a hawnna-ah Khuallian Governor Dr. Vijay Kumar Singh chuan MBOCWWB hnuaia scheme pahnih Eizawma Kailawn leh Rahbi Chertu chu a hawng a ni.

LESDE Kut ni hnihna ah hian State Level Vendor Development Programme, Public Sector Unit 5 —Power Grid Corporation of India Limited, National SC/ST Hub Guwahati, Department of Food Technology Mizoram University, Mizoram Rural Bank (MRB), Food Corporation of India-te hnen atangin Seminar neih a ni a. Pradhan Mantri National Apprenticeship Promotion Scheme (PM NAPS) pawh neih niin establishment 20 vel leh apprentice 100 chuang vel zet an inziaklut a. A ni thumna atangin intihhlimna hun hmangin Skill Development lam atanga designer palite (Valkia, Mahlui, Teremi leh Tluangpuii Hmar) kutchhuak chu Mizoram-a Model-ten pochhuah sakin, live concert-te neih a ni.

LESDE Kut-ah hian Stall 162 hawn niin heng zingah hian Mizoram pawn atanga hawn Stall 11 a awm a. February ni 13 thlenga chhinchhiah danin kuthnathawkte leh hna zawng mek mi 234 sawrkar scheme hrang hrang hnuaiah an inziaklut a, mi 28-in hna an hmu a, Health Check-up mi 1000 chuangin a thlawna tiin Stall te inhralh zat chu nuai 35 bawr a ni.