Mitdel Hawrawp leh Sign- language a buatsaih POCSO Act leh a kaihhnawih tlangzarh

Project Child Law for Everyone, Accessible and Readable (CLEAR) hnuaia pianphunga rualbanlo naupangte tana buatsaih, POCSO Act leh a kaihhnawihte Sign Language leh Mitdel Hawrawp (braille) a siam chu nimin khan Adviser to Chief Minister (Political) Lalmuanpuia Punte chuan a tlangzarh.

Aizawl-a I&PR Conference Hall-a hemi puala hun buatsaih ah Lalmuanpuia Punte chuan POCSO Act leh a chhunga hriattur pawimawh zualte Braille leh Sign Language a buatsaih a ni ta chu lawmawm a tih thu a sawi a. Pianphunga rualbanlo naupang ten anmahni tana hamthatna awm angte leh harsatna an tawh pawha humhimtu dan awm angte an hriat ve ngei chu an chanvo a ni tih sawiin, chumi atana Mitdel ten anmahni hawrawp ngei leh ri hriatna lama harsatna nei ten sign language ngeia chutiang dan hriatna tur an nei thei chu ram pum huap pawhin a chhuanawm hle tih a sawi a. POCSO Act leh a chhunga pawimawh zualte sign language leh braille-a siam chu Mizoramin bung thar pawimawh tak a kaina leh rualbanlote ngaihsak kawnga mipuite hmasawnna thlentu a nih ngei a beisei tih a sawi bawk.

He hun hi MSCPCR Member Darthakunga chuan kaihruaiin khual zahawm Commissioner for Persons with Disabilities (PWD) Vanlaldiki Sailo pawhin Project CLEAR hlawtlinna atana thawktu zawng zawngte inpekna chu fakawm a tih thu a sawi a. Kalkhawmte chu pianphunga rualbanlote tana tanpuitu leh an tlakchhamnaah te chhawmdawltu nih tum theuh turin a chah a. WCD Director Zoramthangi Chhangte pawhin he hunah hian thu a sawi bawk.