Meichher Award 2025 semna hun hman a ni

School Education Department-in thlakip a an tihchhuah ‘Meichher’ Chanchinbu chuan nimin khan ‘Meichher Award 2025’ semin School Education Director Angela Zothanpuii chuan he hun hi a hmanpui a ni.

School Education Directorate Conference Hall-a hemi puala hun hman ah Education Director Angela Zothanpuii chuan Meichher chu Mizo thu leh hlaa kan Article lar tak tak lo chhuahna a nih thu leh thuziaktute pawh mi chhuanawm tak tak an nih thu a sawi a, “Thartharte hian lehkha ziak hlutna hi kan hriat thar leh a ngai a, hnam pum leh Department pawhin hma kan lak nasat a ngai hle a ni,” a ti bawk.

Meichher Best Article of the year 2025 atan ‘Lal thar chibai i buk ang u’ tih niin Rev. Zosangliana Colney Mission Veng Aizawl ziak a ni a, pahnihna chu ‘Hlawhtling tura beidawnna’ tih Joseph L.Ralte Chawnpui Veng ziak niin ‘Vawk leh Mizote’ tih Commissioner Lalkiamlova Tuikual South Aizawl ziak chu pathumna a ni bawk. Meichher Best Contributor of the year-ah pakhatna JH. Biakmawia Electric Veng, Aizawl niin Familia Laltansanga Fanai Zotlang Lunglei leh Mahmuaka Chhakchhuak Chanmari Lunglei ten an dawt bawk.

Meichher Editor TC. Lalremsiama tarlan danin Meichher chanchinbu hi 'ZORAM ÊNG' tih hming vuahin March/April 1975 atang khan thlakip chhuakin chhuah tan a ni a. October 1975 atang khan 'MEICHHER' tia a hming thlâkin nikum 2025 khan kum 50 a tling a, kum 1975 March & April thla chhuak atanga chhiarin January 2026 chu bu 815-na a ni. Meichher Publisher atân hian Department hotu ber Director chu hman a ni thîn a, Publisher ni lai chu Angela Zothanpuii niin Editor mi 10 an awm tawh a; Editor hmasa ber chu R. Lalrâwna a ni bawk. Meichher-a thu chhuahte zingah hian zirlaibua sengluh thuziak 22 a awm tawh bawk a ni.