Minister Lalrinpuii’n Sawrkar laipui hotute dawr

Health & Family Welfare leh Social Welfare Department changtu Minister Lalrinpuii chuan niminpiah khan sawrkar laipui-a mi pawimawh hrang hrangte New Delhi-ah a kawm.

Minister Lalrinpuii hian Ministry of Women & Child Development changtu Union Minister Annpurna Devi chu a Pisa-ah hmuin Mizoram atanga Nu leh naupang chawikanna project hrang hrang thehluh te chungchang a sawipui a. Hmun hrang hranga Anganwadi Centre building chhe lutuk sak thatna tur proposal leh Hmeichhe hamthatna tura project a thehluh hrang hrangte chu tun Financial Year tawp hma a ngei a sanction sak turin a ngen a, Union Minister chuan a theih ang ang a tihhlawhtlin ngei a tum thu a lo hrilh a ni.

Union Minister of State for Ministry of Ayush Prataprao Jadav pawh kawm nghalin, Mizoram chhung hmu hrang hranga 10 bedded Hospital siam belhna tur ruahmanna te sawipui a, Pratap Rao hian Hortoki-a 10 Bedded Hospital siam tur chu Supplementary action plan-a telh a pawmpui dan kawng lo zawn sak ngei a tum bakah 10 bedded Hospital dang pathum pawh sawrkar kumthar lamah hmalak dan kawng zawn a tum thu a lo hrilh a. Ayush hnuaia 10 Bedded Hospital kan neih mek hnuaia thawktute hlawh min tumsak thin pawh kumthar lamah pawh min tum sak zui leh a lo remtih sak bawk.

Minister Lalrinpuii hian Upate pension chungchang enkawltu ber Senior Economic Advisor, Ministry of Rural Development, Kalyani Mishra-i pawh a Office-ah kawm nghalin Upate pension chungchanga harsatna hrang hrangte an sawidun a. SNA Sparsh avanga Central lamin Upa pension an release theih loh reng chu an chinfel tep tawh thu Economics Adviser hian lo hrilhin, SNA Sparsh a fel hnu chuan a rang thei ang bera release zel an tum thu a lo hrilh bawk a ni.