Horti Minister in Kolasib tlawh

Horticulture Minister C. Lalsawivunga chuan nimink han Kolasib District chhunga Horticulture Department hmalakna hrang hrangte a tlawh.

Minister hian chawhma lamah Centre of Excellence (CoE), Thingdawl tlawhin helai hmuna Horticulture hotuten an hmalakna hrang hrangte anh lo entir a, CoE-ah hian Horticulture thiamna hmanga Tomato leh Strawberry chin dan te, Pangang hmanga leitha siamna (Vermicompost) te, leitha atana Bawng an vulh te leh pangpar an khawih dante Minister hi an lo entir a, Centre of Excellence for Horticulture, Thingdawl hi kum 2013-a din niin kum 2015-ah hawn a ni a. He Centre in a tum ber chu kuthnathawktute hnena Quality Planting Material semchhuah a ni.

Minister hian Kawnpui Darnam Zau-a Balhla chinna hmun tlawhin, kuthnathawktute hmalakna leh harsatna te a enpui a. Hei bakah hian Block Horticulture Office, Thingdawl leh Ginger Collection Centre, Thingdawl te a tlawh nghal bawk a. Chawhnu lamah Assembly Deputy Speaker Lalfamkima hovin Improvement of Link Road, Project Veng to Tuichhuahen Zau-a hmalakna te a enpui leh a, District Horticulture Office-ah Officers leh Staff te nen hun an hmang zui a ni.

Kolasib District-ah hian Horticulture Department Office hi hun engemaw chen kalpui a nih hnuah August 1, 2003 khan Divisional Horticulture Office-ah hlankai a ni a. Tun dinhmunah District Horticulture Office, Kolasib District hnuaiah hian Block Horticulture Office pahnih - Bilkhawthlir Block leh Thingdawl Block te a awm mek a. Horticulture Minister chuan Department hmalakna hrang hrang a hmuh te chu tha a tih thu sawiin, thawktute leh inpekna pawh fakawm a tih thu a sawi a. Kolasib District chu leilung hausakna leh thlai tharchhuah kawngah theihna sang tak nei a ni tiin, tun aia nasaa tan la thar turin a chah nghal bawk.