Electric Bill tihhniam phut

Mizoram Pradesh Congress Committee (MPCC) chuan Electric Bill pung tihniam tura sawrkar an phut thu an sawi.

Nimin-a thuchhuah an siamah MPCC chuan tunah hian Mizoram hmun hrang hrang atanga report an dawn danin Electric Bill a pung nasa hle nia sawiin, “Thla khata Rs. 600/- chawi thin ten tunah chuan Rs. 7,000/- bawr velte chawiin cheng sangkhat pawh chawi tling ngailo ten cheng sing chuangte an chawi ta mai hi MPCC chuan pawi a tiin a ngai thu tak hle a ni,” an ti a. ZPM ten an Manifesto ah Electric Bill an tihsan ve loh tur thu a ziah bakah thla hmasa mai January ni 12, 2026-a ZPM Office hawnna inkhawmah Chief Minister Lalduhoma chuan, “Kumtin in Electric Bill hi puangin, Sawrkar liamta ah Unit khat man chu Rs. 5.83/- a ni a. Hei hi kan chhawm a. Kum 5 chhungin keini chuan Electric Bill hi kan tipung ve dawn lo a ni,” tiin a sawi nia tarlangin, “Tunah hian mipui rawka Sawrkar sum tuakna atan Electric Bill chu ZPM Sawrkarin a tisang ta vak mai hi a pawiin an intiamna ang leh CM Lalduhoma sawi ang ngeiin Unit khata Rs. 5.83/- a Bill siam tha leh turin MPCC chuan ZPM Sawrkar a hriattir a ni,” an ti a. Electric chhit man sang chak ta lutuk chu an zirchiang zel dawn tih an sawi bawk.

MPCC chuan ZPM Sawrkarin tuialhthei man a tihsan hnuah thilman a to phahin lirthei chuanman a to phah nia sawi bawkin, “Ran Chhiah lak thin chu duh tawk mai loin Animal Registration fee a khawn a. Municipal hnuaia awm pawh nilo, Zoram dung leh vang a khaw hrang hrang a Property Tax a khawn ta mai hi mipui rawknaah MPCC chuan a ngai a ni,” an ti bawk.