LADC sawrkar-ah Dy. CEM leh EM mi 8 lakluh an ni

Lai Autonomous District Council (LADC) a MNF leh Congress thawkdun United Legislature Party (ULP) Sawrkar-a Deputy Chief Executive Member (CEM) leh Executive Member mi 8 te chu nimin khan Lawngtlai Bawrhsap Donny Lalruatsanga chuan rinawmna thu tiamtirin a lalut.

Deputy CEM leh EM te lakluhna inkhawm hi Lawngtlai-a LADC CEM Office tual-ah neih niin Bawrhsap chuan Deputy CEM atan  Sanghuliana Mualchin lalut hmasa berin, a ni bakah hian MNF atangin Executive Member tur mi 5 leh Congress atangin Executive Member tur mi 3 a lalut a ni. Nimin-a EM atana lakluh tak te hi Lalzahawma Chinzah, Lalropuia Chinzah, C. Hrangthianga, JB. Vanhoy, HC. Lalthawmliana, H. Vanlaltanpuia, HC. Lalengkima leh Sukriti Chakma te an ni.

LADC Chief Executive Member (CEM) C. Lalsawmzuala chuan a kaihhruai sawrkar fu ke kima a dinchhoh nan Larsap leh State Sawrkar in theihtawp an chhuahpuina ah lawmthu a sawi a, Sawrkar thar chuan ram leh mipui tan theihtawp a chhuah tur thu a sawi a ni.

LADC Executive Member atan lakluh zingah Sakeilui Bialtu Congress Member Sukriti Chakma, Social Welfare changtu chu Central Young Lai Association chuan LADC Executive Member-ah Chakma dah a ni chu ram leh hnam ah nghawng thalo hringchhuak thei ni a hriain, a Office luahlo turin an ngen a, Sukriti Chakma hian nimin khan a Office a luah ve ta lo a ni.