MSU-in H&TE Minister ngen

Mizo Students’ Union (MSU) hruaitute chuan tun thlenga College Zirtirtu qualify lo ten zirtirna an la pe chu pawi an tih thu an sawi.

MSU General Hqrs. hruaitute hian nimin khan Higher & Technical Education Minister Dr. Vanlalthlana chu a chenna In-ah hmuin College Zirtirtu qualified lo te chungchang an sawipui a. He hunah hian MSU hruaitute chuan nikum lam atanga hma an lo lak tawhna leh Zirlai thahnem tak nena College Zirtirtu qualify lo te ban an nih theih nana kawng hial zawha hma an lakna kal zelah High Court in Stay Order a chuah avanga tun thlenga qualify lo ten zirtirna an la pe chu pawi an tih thu an sawi a. Heng zirtirtu qualify lo te hi an contract period February 28, 2026-a tawp tawh turah extend a nih tawh loh tur thu notification a tichhuak chu lawmawm an tih thu an sawi a ni. 

He hunah hian MSU President B. Lalkhawngaihzuala chuan qualify lo chunga College Zirtirtu nih tum tlat chu thil zahthlak anih thu leh heng Unqualified Asst. Professor te pawh hi zirlaite hmangaihna vangin harsatna siam lova tawp zui ngam turin a chah a. Unqualify te contract a tawp veleh zirlai ten an tawrh loh nan an aiawh tur a hma thei ang bera lak anih theih nan Minister hnenah hian an ngen nghal bawk a ni.

Dan ang thlapa RUSA kaltlanga Asst. Professor lak ten tun thlenga an dikna chanvo hmu lova hun an la hmang chu pawi an tih thu MSU chuan sawi bawkin, hei vang hian tun dinhmuna MPSC-in Asst. Professor-a lak turah pawh a tam zawk in application an thehlut a ni tih hriat a ni tih an sawi a, RUSA kaltlanga Asst. Professor-te hi tun hnalak ah hian an tlin chuan an post hi an kalsan a ngai dawn a, chutihrualin an post kalsan ah erawh an aiawh tur lak a nih theih dawn loh avangin hei hi thil pawi tak, zirlaite harsatna thlen thei a ni tih sawiin,  RUSA kaltlanga Asst. Professor lak te hi Mizoram sawrkar hnuaia tih nghet vat turin an ngen bawk a ni.