Kaziranga tlawh tur College zirlaite vailiam

Mizoram chhunga College hrang hrang paruk(6) atang thlanchhuah zirlai leh Official mi 45 te chu Nature Tour nei turin nimin khan Aizawl-a Chief Wildlife Warden Office tual atangin vailiam an ni.

Nature Learning Centre (NLC)-Mizoram bultuma Nature Tour-a kal tur zirlaite hi Mizoram-a College thlanchhuah paruk (6)- Govt. Champhai College, Govt. Serchhip College, Zirtiri Residential Science College, Pachhunga University College, Govt. Aizawl College leh J. Thankima College atangte a thlan an ni a, February 2 atanga ni 6 chhung hian Nature Tour hi neih tur niin Kaziranga National Park, Guwahati Zoo, Ramsar Site-Deepor Beel, Vulture Breeding Centre, Pygmy Hog Breeding Centre leh Conservation Centre pawimawh dangte an tlawh dawn a ni.

He Nature Tour-a kal turte thlahna hun hi Conservator of Forests (Central Circle) Laltlanhlua Zathang chuan hmanpuiin zirlaite fuihna thu a sawi a, Kaziranga National Park chu India ram mai nilo, khawvel pumah pawh Wildlife Park lar tak a nih thu leh he Nature Tour atanga a tam thei ang ber Wildlife Conservation chungchangah thiamna rawn hawn turin a chah a. Champhai DFO leh Nature Learning Centre Advisory Board-a Member Secretary Lalbiakchama Chawngthu chuan Nature Learning Centre kalphung bakah he Centre hnuaia hlawhtlinna hrang hrang an lo neih tawhte tarlangin, NLC hnuaia hmachhawpte a tarlang bawk.

Nature Learning Centre-Mizoram hi kum 3 chhung project niin Champhai Forest Division hnuaiah kalpui mek a ni a. National Action Plan on Climate Change (NAPCC) hnuaia Mission pariat zinga pakhat-National Mission on Himalayan Studies (NMHS) atangin Fund hi hmuh a ni.