HIV kai hmuhchhuah thar tam

Nikum (2025) April leh December thla inkar chhung khan Mizoram-ah HIV vei mi 3,354 hmuhchhuah thar an ni.

Mizoram State AIDS Control Society (MSACS) hotute sawi danin nikum (2025) April atanga December thla thleng khan Mizoram-ah mi nawlpui enfiahna atangin HIV hri kai mipa 2,191 leh hmeichhia 980, an vaiin mi 3,171 hmuhchhuah an ni a. Nu naupai lai HIV hri kai hmuhchhuah mi 183 an awm bawk a ni. Nikum-a hemi hun chhunga HIV hri kai thar zinga za zela 65.32 chu mipa niin hmeichhia hi naupai lai tiamin za zela 34.68 a ni a. Hemi hun chhunga HIV kai zinga za zela 70.61 chu mipat/hmei-chhiatna hman vanga kai an ni a, za zela 26.87 chu Syringe leh hriau inhmantawm atanga kai niin za zela 1.77 chu naute in a nu hnen atanga a kai an ni bawk. 

HIV hri kai hmuhchhuah zinga a tam ber chu kum 15 leh kum 49 inkara upa an ni a, hemi kum bithliah hi za zela 88.71 lai an ni a. Hemi kum zingah hian kum 25 leh 34 inkar chu tam ber leh bawkin mi 1,193 an ni a, kum 35 leh 49 inkarin dawtin mi 976 an ni a, kum 15 leh 24 inkar mi 644 leh kum 14 leh a hnuailam mi 59 an awm bakah kum 50 chunglam kai thar mi 299 an awm bawk.

Chhinchhiahna atanga a lan danin kum 1999 October thla a Mizoram-a HIV kai hmuh-chhuah a nih atanga nikum December thla inkar chhunga Mizoram-a HIV kai hmuhchhuah tawh zawng zawng chu mi 33,878 an tling tawh a ni. Nikum December thla a HIV hrik kai la dam, HIV damdawi Antiretroviral therapy (ART) hmanga inenkawl mek chu mi 18,224 an ni bawk.

Mizoram-ah HIV/AIDS kai a tam avangin MSACS hotute chuan a bik takin Sex Workers dawr thin te chu fimkhur tura an duh thu an sawi a. Mizoram-ah Sex hmanga eizawng Aizawl-ah a tam ber tih sawiin, in register mi 1000 chuang an awm tih an sawi bawk.