Chief Minister in Oil Palm leh Kuhva-a hmalakna a hawng

Chief Minister Lalduhoma chuan Zirtawpni khan Kolasib District Buhchangphai-a Oil Palm chinna panna kawngpui Ramthar Zau Oil Palm Link Road leh Bukvanneia Godrej Agrovet ten Oil Palm chingtute tana mamawh engkim man tlawm zawka an leina tur Samadhan Centre, One Stop Solution an din thar chu hawng a. He hunah hian Chief Minister chuan Oil Palm chu Prime Minister-in a ngaipawimawh thu leh DoNER Minister pawhin a sawi ri fo bawk tih sawiin, “Oil Palm lama hma kan sawn theih nan kan ngaihtuahna kan seng nasa a, Link Road pawh kan laih belh zel dawn a ni,” a ti.

Chief Minister in a hawn Link road hi kilometer hnih-a thui niin Concrete Pavement a ni a, cheng nuai 110 sen a ni. He Zau-ah hian chhungkaw pakuain huan an nei puitling tawh a, nikum khan cheng nuai 45 man an hralh a, tunah hian Chhungkaw dang 15 in an ching thar leh mek bawk. Godrej Agrovet One Stop Solution-ah hian Oil Palm farmers-te mamawh Fertilizer te, Pesticide leh Insecticide te, tui pekna hmanrua te, a lawhna te leh thil dang tam tak man tlawm zawka lei theih turin chhawpchhuah a ni dawn a. Fertilizer bikah hian MRP a hralh theih turin ruahmanna an siam a. Farmers leh Official-te tan Training Centre changtlung tak an siam bawk.

Zirtawpni vek khan Chief Minister Lal-duhoma hian Buhchangphai-a SSB Agro ten Kuhva sawngbawlna khawl an bun chu a hawng bawk a, Department chhinchhiah danin Mizo-ram-ah kuhva huan hi Hectare 30,000 vel a zau a awm mek thu leh nikum 2024-2025 chhung khan Mizoram puma Kuhva tharchhuah zat chu Quintal 2,00,000 vel nia chhut a nih thu Chief Minister chuan a sawi a. tuna an khawl hawn thar ah hian darkar khatah kuhva pum 3000 kheh thei bun a ni bawk.