India Team-a tel Mizo Futsal Player te lawmpui

South Asian Football Federation (SAFF) buatsaih ‘2026 SAFF Futsal Championship’ khelh zawh taka Silver Medal latu India Team-a tel Mizo Futsal player parukte chu Sports Minister Lalnghinglova Hmar chuan nimin khan a Pisa-ah lawmpuina hun a hmanpui a. SAFF buatsaih Futsal inelna hi January 14 atanga 26, 2026 chhung khan Thailand-ah neih a ni a, a vawikhatna niin India squad-ah player 14 koh niin heng zinga paruk chu Mizo an ni a. India hian match ruk atangin vawi thum hnehna changin vawi hnih draw result an nei a, a pumpuiah pahnihna an ni a. Mizo Player te hi Jonathan Lalrawngbawla, Zotlang, Aizawl; Vincent Laltluangzela, Tlangnuam, Aizawl; H. Lalrinzuala, Electric Veng, Aizawl; K. Roluah-puia, Tuikhuahtlang, Aizawl; Lalsangkima, Electric Veng, Aizawl leh Lalsawmpuia, Electric Veng, Aizawl te an ni. He hunah hian Sports Minister chuan India Team-ah Mizo thalai paruk an tel chu lawmawm a tih thu sawiin, India team-a tel Mizo player-te hi Mizoram Sports Incentive Cash Award sem leh hunah an tel ve theih tur thu a sawi bawk.