Israel-ah mi 300 vel pem turin an inbuatsaih mek

Mizo Juda ti a sawi, Bnei Menashe ti a invuah mi 300 vel chu tun thla chhunga Israel rama pem turin an inbuatsaih mek.

Aizawl-a Bnei Menashe hruaitute’n an sawi danin Mizoram leh Manipur atangin mi 300 ve ve Israel-a pem thla turin an inpuahchah mek a, tun thla chawhnu lamah chuan India chhuahsan thei turah an inngai a ni. Ram Thianghlim-a pem turte hi nikum December thla bul lam khan thlan an ni a, tunge pem tur tih chiah erawh chu hriat a la ni lova, pem thei turte thlang tur hian Juda Rabbi 9 tiamin Jewish Agency for Israel mite leh Delhi-a Israel Embassy atangin mi 35 vel Aizawl-ah ni 10 chhung an rawn cham a, pem thlak duhte chu an hmaah hian an inlan a ni.

Bnei Menashe hruaitute chuan pem thla tura thlan ture chu Bnei Menashe member a inziaklut, mipa an nih chuan serh tan tawh leh Juda Sakhua a inlet tawh an nih bakah Juda Sakhaw serh leh sang an hriat thuk zawngte nen enfiah an ni a. Israel an thlen thlak tirh atanga chhuta thla 6 nung Passport neih a ngaih bakah Kristian an lo la ni ru reng em tihte pawh chik taka zirchian a ni a. Mizo Juda nihna a Israel rama lo pem tawh chhungte chu duhsak bik an nih tur thu an sawi bawk a ni.

Israel sawrkar chuan tunhnai khan India ram hmarchhak, Mizoram leh Manipur a Mizo Juda mite, an rama pem duh mi 6,000 thelh chu kum 2030 ralhma a pem thlak a phalsak a. A tahtawla an pemna turah tun thla hian a hlawm hmasa ber mi 300 ve ve chu Mizoram leh Manipur atanga chhuk turin ruahmanna siam a ni a. Kal tur thlanchhuahte hi Rabbi-te hian an rawn puan thuai rin a nih thu Bnei Menashe hruaitu Jeremiah L. Hnamte chuan a sawi a ni.