Oil leh gas renchem inzirtirna ‘Saksham 2025-26’ Chief Minister in Aizawl-ah a hawng

Indian Oil Company Limited ten kum tin-a an kalpui thin Hapta hnih chhung Oil leh Gas renchem inzirtirna hun, ‘Saksham 2025-2026’ chu nimin khan hman tan leh niin Chief Minister Lalduhoma chuan Aizawl-ah he hun hi a hawng a ni.

Aizawl MINECO-a Mizofed Petrol Pump hmuna ‘Saksham 2025-2026’ hawnna hunah hian Chief Minister Lalduhoma chuan Oil leh Gas te hi India ramin kan la intodelh loh thu leh kan mamawh zaa sawmriat vel kan lakluh thin thu sawiin, kawvel-a hmang tam ram pathumna kan nih thu a sawi a. “Oil leh Gas kan hman tam hian boruak chhia, Carbon Dioxide leh Sulphur Dioxide te kan siamchhuak a, chu chu mihring hriselna tichhe thei a ni. Kan thing leh mau leh sik leh sa ten ten an chhiatpui a. Kan renchem hian sum leh pai kan ren tihna a ni a, kan ramngaw te kan duat tihna a ni bawk a ni,” tiin Oil leh gas chu insiamthar leh zung zung chi an nih loh thu a sawi a, “Vawiina kan renchem hian kan tu leh fate tan kan lo dahtha tihna a ni tel,” tiin nitin mamawh pawimawh tak an nih bawk si avangin renchem taka kan hman thiam a tul thu a sawi a ni.

Oil leh Gas lama Mizoram hmasawnna tura hmalakna thenkhat tarlangin Chief Minister Lalduhoma chuan, “Domestic Gas hi Aizawl-ah pipeline connection a awm theih nan hmalak mek a ni a. Tripura atangin a pipe hi chak taka phum mek a ni. Mizoram leihnuai-a oil leh gas zawn hna hi chak zawka kalpui a nih theih nan kan bawhzui zel a. Green Energy lamah pawh hmasawn theihna remchang kan neihte chak takin kan thawk mek a ni,” a ti bawk.

He hunah hian FCS&CA Department changtu Minister B. Lalchhanzova pawhin nitin Gas Supply lamah harsatna kan tawh loh nan an tang hle tih sawiin, “Mualkhang Gas Bottling Plant kan tuaithar mek a, hna an thawk mek a. Oil supply chatlak vanga harsatna kan tawh thin te tih ziaawm nan Oil Depot neih tumin kan bei mek bawk. Oil leh gas hi nitina kan mamawh an nih avangin a semchhuaktute hian mipuite rawngbawlna hna pawimawh tak in thawk a, mipuiten harsatna an tawh loh nan thahnem ngai taka thawk zel turin kan beisei che u a ni,” a ti bawk.

‘Saksham 2025-2026’ hawnna hun hi Z. Lhungdhim, DGM, LPG (E), State Level Coordinator chuan kaihruaiin Petroleum Planning & Analysis Cell, India chhinchhiah danin kum 2024-25 chhungin Mizoram hian Diesel (HSD) 119.20 Thousand Metric Ton, Petrol 58.83 Thousand Metric Ton leh LPG 34.6 Thousand Metric Ton kan hmangral a. LPG Distributor 60 awm mekin Petrol Pump (retail outlet) 115 a awm a, EV Charging Station erawh ala awm lo thung a. Lirthei hi VAHAN atanga a lan danin Mizoram-ah 4,22,661 vel ziahluh tawh a ni.