Chhiarpui Training-ah Serchhip District atangin tel

India ram Chhiarpui neih tur atana inbuatsaihna kal mekah nimin khan Directorate of Census Operations, Mizoram bultumin Aizawl leh Serchhip District-a Official te tan Training neih a ni.
Nimin a Training hi Aizawl DC Pisapui Hall-ah neih niin Aizawl Municipal Corporation (AMC) leh Serchhip District huamchhunga chhiarpui neihtu tur District leh Charge Level Officer leh Official te an tel a, Serchhip District atang pawhin Charge Officers mi 5- Jane C. Vanlalmuanpuii (Principal DIET), John Lalbiakliana (SDEO North Vanlaiphai), Melody Betlu (SDEO Thenzawl), Dr. Lalramdintluanga (BDO Serchhip) leh Dr. Marilyn Lalruatkimi (BDO East Lungdar) bakah Addl. Charge Officer C. Vanlalhruaia (DCO) bakah Sub-Divisional Charge Officers 3- Rebecca Ladinmawii Hrahsel (SDO Sadar), K Lalhlimpuia (SDO Civil Thenzawl) leh Dr. Marilyn Lalruatkimi (SDO Civil North Vanlaiphai) te an tel a. Training hawnna hi Aizawl DC leh Principal Census Officer (PCO), Aizawl District Er. Lalhriatpuia chuan kaihruaiin Directorate of Census Operation atangin Shivam Gupta leh Melody Lalnunsangi ten zirtirna an pe a ni.

Mizoram tan Census 2027 hi Phase hnih a kalpui a ni dawn a, a Phase-I na hi House Listing and Housing Census (HLO) niin a Phase-II na hi Population Enumeration (PE) a ni ang. Phase-I ah hian In dinhmun leh a chhunga awm thil (Housing Condition, Amenities, Assets and Facilities) Data lakkhawm a ni anga. Phase-II ah hian mimal chanchin leh economic dinhmun (Individual level demographic, social and economic) data lak a ni thung ang. Chhiarpui Phase-I hi April 16,2026 atanga May 15, 2026-ah House to House Field Work neih a ni ang a. Self-Enumeration hi April 1, 2026 atanga April 15, 2026 chhungin neih tur a ni.

India ram chhiarpui hmasa ber hi kum 1872 a neih niin tuna Census 2027 neih tur hi India Independent hnua chhiarpui vawi 8-na tur leh India iIdependent hma nen a vawi 16-na a ni.