Animal insurance atan Training buatsaih dawn

Mizoram sawrkarin Natuional Insurance Company (NIC) thawhpuia ranvulhtuten an ranvulh te an thih palh pawha sum an hmuh theihna tura February ni 10, 2026-a 'Animal Insurance' a tlangzarh chu a taka kalpui turin thla thar, March thla tir lam atangin District tinah Vety Officer te tan training buatsaih a ni dawn.

Akashvani News Aizawl-in tun hnai khan Animal Insurance chungchangah hian AH&Vety Department Director Dr. Lalrotluanga Sailo chuan, Animal Insurance hi chetsualna leh khuarel chhiatna vanga emaw, hri vang emaw a ran an thih palha ranvulhtu ten zangnadawmna an hmuh theihna tura ruahman a nih thu a sawi a. Ran Insurance atan hian National Livestock Mission atangin cheng nuai 138.92 hmuh a nih tawh thu sawiin, Animal Insurance hi Central-in a ngaipawimawh a, kumtin kalpui zel kan tum, a ti.

Mizoram sawrkarin NIC thawhpuia ran insurance a kalpui hian Bawng, Sial, Vawk, Beram leh Kel a huam thu sawiin, kum 1 chhung atan zel insurance hi tih tur a nih thu leh insurance lak dawnin natna avanga ran thi leh accident avanga thite chauh a huam thu a sawi a, hetihrual hian natna avanga ran thite chu insurance tih atanga ni 21 ralhmaa thi a nih chuan insurance hi claim theih a nih loh thu a sawi a, accident avanga thi an nih erawh chuan eng hunah pawh claim theih a nih thu a sawi bawk.

AH&Vety Asst. Director Dr. Zohlimpuia chuan tunhmaa ran insurance awm tawh te ah ran pakhata insurance tih man a sàn thin avangin ranvulhtu ten harsatna an tawh thin thu a sawi a. a; Insurance hi ranvulhtu ten an lak (claim) dawn chuan NIC lam hian ni 15 chhunga an tihfel hman a ngai dawn tih pawh sawiin, ni 15 chhunga an tihfel hman loh chuan pawisa an pek tur chu zaa 12 (12%)-in a pung dawn tih a sawi bawk.