April 30 hmain Sairang - Vairengte siam zawh tum; JAC ten NHIDCL Office Hual hnatlang neih an tum thung

Sairang leh Vairengte inkar kawng siamthat hna thawktu Company pathum te chuan Mizoram châk lakna kawngpui pawimawh ber siamthat hna chu kumin April 30 hmain zawhfel an tum thu an sawi a. Kolasib-a Joint Action Committee on National Highway chuan tun thla ni 16-ah NHIDCL Office chu mipui nen ‘Hual hnatlang’ neih an tum bawk.

Nimin khan Sairang leh Vairengte inkar kawngpui siamthat hna thawh mek chu ZPM Consultant Er. C. Lianlunga leh Secretary rual te chuan tlawhin National Highway enkawltu National Highways & Infrastructure Development Corporation Limited (NHIDCL) leh an hnuaia thawk Contractor pathum - Balaji, BR Goyal leh J. Infratech Private Limited (Jandu) ten an hmachhawp leh an harsatna an lo thlen a. NHIDCL Project Manager, Saksham Tyjia chuan an hnathawh tawh chin te lo hrilhin, ZPM Team Leader Er. C. Lianlunga chuan kumdang-a Fur laia harsatna thleng thin ang chu kumin ah thlentir an tum loh thu sawiin, April ni 30, 2026-a zawh an tum ang ngei hian an zawh hman ngei an beiseipui thu a sawi a ni.

Hetihlai hian Kolasib-a Commercial Vehicle Pawl hrang hrang te leh MUP, MZP leh Y4K ten an din, ‘Joint Action Committee (JAC) on National Highway, Kolasib’ chuan Kolasib District leh khawpui chhung kawngpui chu ngaihthah a nihna a rei tawh avang leh Pawl hrang hrang leh Sawrkar atang pawh a nawrna vawi tam tak a awm tawh chung pawha hmalakna hmuh tur a la awmloh reng avangin a siamtu tur NHIDCL te chuan Mizoram mipui te an zah lovin an thamlo hle tih an sawi a. Kumin 2026 Fur lo thlen hma hian eng dinhmun ah mah an thlenpui leh dawn chuang lo nia a lan avangin tun thla ni 16 khian NHIDCL Office chu mipui nen ‘Hual hnatlang’ neih relin NHIDCL Office chu kalh sak nise an ti a. “Hemi karah hian an hnuaia Contractor (J Infratech/ JANDHU, Balaji leh BR Goyal) te chu an hnathawh lai chawl lo tur leh a hmaa an Bill tih tan sak thin pawh ti tawhlo turin kan hriattir bawk a ni,” an ti bawk.