Feb. 26-ah Mizoram Budget pharh tura ruahman a ni

Tun thla ni 17 atang khian Mizoram Legislative Assembly Budget Session neih a ni dawn a, February 26-ah Finance changtu Chief Minister Lalduhoma chuan sawrkar kumthar atana Mizoram sawrkar Budget a pharh ang.

Mizoram Assembly Speaker Lalbiakzama kaihhruai Business Advisory Committee chu niminpiah khan thukhawmin February 5-a BAC thukhawmin Session neih chhunga hun hman dan tur an lo ruahman tawh chu thlirnawn lehin an ti danglam a, Finance changtu Chief Minister Lalduhoma'n 2026-2027 sawrkar kum atana Mizoram Budget a pharh ni tura February ni 19 an lo ruat tawh chu February ni 26-a pharh zawk turin thutlukna an siam a, Assembly Inkhawm March ni 12 thleng kalpui tura lo rel tawh chu March ni 16 thleng neih tura siamthat a ni a, hetianga BAC thutkhawm nawn a ngaihna chhan hi Finance Department lamin Budget pharh tur an la peihfel hman loh avang ni a hriat a ni.

Assembly Budget Session lo awm tur hi Assembly dinglai, Assembly pakuana thutkhawm vawi 6-na tur a ni a, February ni 17, 2026 chawhma dar 10:30-ah tanin, kumtin-a Assembly Inkhawm hmasa bera tihdan phung pangngai angin Larsap Gen. Vijay Kumar Singh chuan House chhungah thu a sawi anga. Larsap thusawi chunga lawmthu sawina Motion pulutin he Motion hi a tuk-ah sawiho nghal a ni ang. February 26-ah Sawrkar kumthar-a Mizoram Budget hi pharhin a karleh March ni 1 leh ni 2-ah a tlangpui a sawihona hun hman a ni ang a. Hemi hnu hian Minister te Department chanpual enkawlna tur sum ruahman hi a tahtawla sawiho chhoh a ni ang.

Tun thlengin House chhunga tawngka a chhan chi zawhna (Starred question) 973 leh Ziaka chhan chi zawhna (Un-Starred question) 339 a lut tawh a ni.