Aizawl Sipai chhuahsan ram-a Convention Centre sak tur ‘Vanapa Hall’ hming puttir tum a ni

Aizawl-a Assam Rifles chhuahsan ram-a Convention Centre sak tur chu ‘Vanapa Hall’ hming puttir tum a ni.

Assam Rifles ram chhuahsan hman dan tur ngaihtuah tura din pawl hrang hrang aiawh telna Advisory Committee chu nimin khan Chief Minister Lalduhoma hovin CM Conference Hall-ah a tum 5-na atan an thukhawm a, Vanapa Hall chu a upat tawh avang leh Assam Rifle-te insawn hma khan sawrkar chuan sak that a tum thu a lo puan tawh chungchang sawiho a ni a, Assam Rifle an insawn takah chuan Vanapa Hall lian zawk leh changkang zawk sakna tur hmunhma a lo awm ta tih sawiin, Advisory Committee hian Convention Centre sak an lo pawm fel tawh chu ‘Vanapa Hall’ hming puttir an rel a. Tuna Vanapa Hall hi chu sawrkarin a hmanna tur a ngaihtuah dawn a ni. Hei bakah hian Canteen Kual-a Hari Mandir sawn nan Loch House leh CHAN Office inkarah ram pek a ni dawn a, Loch House chu a lan dan ti danglam lova chei that an rel a, a lo hlut zual theih nan hman tangkai dan ngaihtuah tur a ni bawk ang.

Aizawl laili laia War Memorial pahnih Canteen kual leh Treasury Square-a mite chu Assam Rifles ten Khatla-a an ramchhunga sawn an tum thu tarlan niin AR chhuahsan ram china kawngpui tihzauh leh siamthatna tur sum sanction hi tunhnaiah hmuh a nih thu leh PWD lam ten hna an tan thei thuai dawn nia tarlan a ni a. AR rama thingphuna, ramngaw nuam tak lo siamtu Bethlehem YMA hnenah te, phal taka an ram sawrkara hlan lettute hnenah te Advisory Committee chuan lawmthu sawiin, Invitees member Association for Environmental Preservation (ASEP) chuan AR ram chhuahsan ram zau zawk (52.57%) a nihna anga humhalh tura ruahmanna siam a nih avangin Advisory Committee chungah lawmthu an sawi tih he hunah hian tarlan a ni bawk.

November ni 18, 2025-a an thutkhawm vawi linaa an lo rel tawh, “AR ram chhuahsan hmunhma leh building hman dilna lam reng reng Committee-ah chhawpchhuah tawh loh nise” tih chu kenkawh zel tura tih a ni a, Chief Minister Lalduhoma’n Khatla-a Assam Rifles ram mawng lam, MINECO bulhnai chu Chief Minister Residence leh CM Office sak nan a dil thin thu tarlan ni bawkin, CM Office leh Secretariat Building inhlat taka a awm hian sawrkar Meeting leh Programme tam tak a kal tluang lo fo a. Hun, tha leh sum sen a sang bawk a, MINECO lama Chief Minister hmunhma sawn chu heng harsatna pumpelhna tha bera ngaih a nih bakah Khatla-a AR ram Joint Survey chuan ram chuang (surplus) hi Hectare khat chuang hlek a awm tih a lo hmuchhuak tawh a. Hei bakah hian tun thla February ni 2, 2026-a Chief Minister leh Lt. Gen Vikas Lakhera, DG, AR te inkawmna ah Khatla-a Assam Rifles ram thenkhat, Tuikual Veng ep ram, MINECO Main Entrance ep atanga awlsam taka pawh phei theih chu sawrkar hnena an hlan theih tur thu Chief Minister hi hrilhin, chak taka bawhzui mek a ni bawk.