AGEY hnuaiah SHG te hman tur lirthei hlan an ni

Mizoram-a Rural Development (RD) Block 12-a Self Help Group (SHG) Member-te hman tur lirthei 19 (Mahindra Pik Up 17 leh Maruti Super Carry 2) te chu nimin khan hlanna neih niin he hun hmanpuitu Rural Development & Administration Department Minister Prof. Lalnilawma chuan heng Motor te hi a vailiam a ni.
Mizoram State Rural Livelihoods Mission (MzSRLM) leh RD&AD-te buatsaiha heng Motor hlan tak te hi RD Block 12- East Lungdar, Lungsen, Aibawk, Khawbung, Tlangnuam, Lunglei, Zawlnuam, Kawrtethawveng, Sangau, Thingsulthliah, Reiek leh West Phaileng-a Self Help Group (SHG) member-te hman tur niin MzSRLM Scheme enkawl pakhat, Aajeevika Grameen Yojana Express (AGEY) hnuaia hlan an ni a. MzSRLM-a CEO Zosangzuali Pachuau chuan lirthei an semchhuah leh AGEY hnuaia hmalaknate tarlangin, Kum 2017 - 2018 khan MzSRLM chuan AGEY hnuaiah RD Block 12 hnenah lirthei 48 a lo pekchhuak tawh thu leh State Institute of Rural Development & Panchayati Raj (SIRD&PR) Mizoram chuan AGEY hnuaia Mizoram hnathawh that dan an zirchianna report, ‘Process Evaluation of AGEY’ an thehluh tawh thu a sawi a, AGEY enkawlna lama hmasawn zel nan MzSRLM chuan an bawhzui dawn thu sawiin, Lirthei hi a thlawna inpek ni lovin SHG member-te chu thahnemngai taka rul leh ngei turin a chah a ni.

He hunah hian RD&AD Minister Prof. Lalnilawma chuan MzSRLM tan tirh hunlaiin State sawrkarin MzSRLM kalphung zir tura a sawmte zingah a tel thu leh, Andhra Pradesh-a SHG nuho a kawm thu leh chutih laia Mizo nuho zingah mahni ro inrel a, ruahmanna siam a, mahni eizawnnaa hma la thei an awm hun a nghahhlelh thin thu leh kum 2013 atanga bultan chu kum 10 chuang a liam hnu chuan SHG-te’n thil siamchhuah lama hmasawnna an ngah thu a sawi bawk. Minister chuan Department hmalaknate tarlangin, Ropuiliani Women Farmer Producer Company kaltlangin SHG thil tharchhuah te Phai-ah thawnin, hralhna tur (market) an zawng zel tih a sawi a, ‘Selhel’ brand hmangin SHG thil tharte an zawrhchhuah dawn thu leh Champhai a ‘SEL HEL Dawr’ a awm thu te pawh a sawi bawk.

Aajeevika Grameen Express Yojana (AGEY) hi August 2017 atanga hman tan niin, DAY-NRLM hnuaia Sub-Scheme a ni a. AGEY-in a tum ber chu thingtlanga awm SHG member-te sum lakluhna hmanrua tur, khaw mipuite’n tangkai taka Bazar, Zirna In, leh damdawi In kalna atana hman tur leh khaw chhehvel ei leh bar hmasawnna thlen thei tur lirthei ruahman sak a ni a. He programme hnuaiah hian MzSRLM atangin Cluster Level Federation (CLF)-te hnenah AGEY atana hman tur sum pek niin, pung awm lovin SHG member-te hian lirthei lei nan pukin, kum ruk (6) chhungin an rul zo leh tur a ni.