Prime Minister’s Internship Scheme (PMIS) sawiho

Sawrkar laipui, Ministry of Corporate Affairs Secretary Deepti Gaur Mukerjee leh Officer rualte chuan niminpiah khan Mizoram Sawrkar hotute kawmin Prime Minister’s Internship Scheme (PMIS) chungchang an sawiho.

Mizoram Secretariat Conference Hall-a sawihona hun hi Labour, Employment, Skill Development & Entrepreneurship Minister Lalnghinglova Hmar chuan kaihruaiin Chief Secretary Khilli Ram Meena chu Co-Chairman a ni a, LESDE Minister Lalnghinglova Hmar chuan Prime Minister’s Internship Scheme (PMIS) thil tum tlangpui sawiin, he Scheme kaltlang hian thalai kum 21-24, High School leh a chunglam College leh ITI zirlaite'n India ram company lian tak takahte internship an tih theihna tur leh chumi hnua an thawh chhunzawm zel theihna tur kawng dappui tum an nih tur thu a sawi a ni.

Ministry of Corporate Affairs Secretary Deepti Gaur Mukerjee chuan thalai tam tak ten lehkha an zir zawhah hna zawn ngaihna an hriat loh thin thu sawiin, “Company leh Industry lianah te thawhna tur leh thawh dan kawng kalhmangte an hriat theih nan PMIS chu a pawimawh hle a ni,” a ti a. Mizo thalai a tam thei ang ber ten lo hlawhtlinpui ngei se a duh thu a sawi bawk. He hunah hian hmalak dan tur hrang hrangte relho niin Awareness Campaign zau zawka buatsaih te, Indian Institute of Corporate Affairs (IICA), Institute of Chartered Accountants (ICA) leh Institute of Company Secretaries of India (ICSI) te nen thawhhona tha zawk neih te, Mizo thalaite’n Company lian tak takahte an thawh theihna tur leh zir chunga an thawh theih dan turte pawh dap zel nise tia rel a ni bawk.