CM's Special Package dawngtu an tam zawk theih nan Rs. 50,000 ah tihhniam a ni - Larsap

Mizoram Larsap General VK. Singh chuan CM's Special Package chu a dawngtu an tam zawk theih nan Rs. 50,000-ah tihhniam a nih thu a sawi.

Mizoram Legislative Assembly 9-na thutkhawm vawi 6-na nimin-a neih tan-ah House Member te hmaa thu a sawi ah Larsap chuan a kaihhruai sawrkar hmalakna hnuaia sum leh pai, Technical Infrastructure leh Institution hmanga Mizoram mipuite thuamchakna tur Mizoram Bana Kaih Hand Holding Scheme chu a thawh hnihna kalpui a ni leh tawh tih a sawi a. He Scheme hnuaiah hian Progress Partner engemawzat te hnenah loan pek tawh niin, Chief Minister’s Special Package Grant hnuaiah Fund pekchhuah a nih thu sawiin, CM's Special Package chu a dawngtu an tam zawk theih nan Rs. 50,000-ah tihhniam a nih thu a sawi a ni. 

Larsap chuan hmasawnna daihrei leh tluantling a awm theihna turin Chief Minister’s Bana Kaih Innovation Challenge din a nih thu sawi bawkin, he hmalakna in a tum ber chu inthlak danglamna hmuh theih leh hmuh theih loh thlentir chunga Mizoram chhunga District, Block leh khaw hrang hranga hmasawnna hnathawhte inzawmkhawm tir a nih thu a sawi a. Kum 2025-26 chhung khan Mizoram-a damdawi lama inenkawlna chu nasa taka tihchak a ni tih sawiin, hemi hun chhung hian Sub-Centre 17 sak zawh niin NEC puihna hnuaiah Mizoram State Cancer Institute CT Simulator chu hman theih a dah a ni a, Mizoram Universal Health Care Scheme chu ICU, Private Cabin, O&G OTs leh General Ward hmang te in tihchangtlun a ni a, PG Medical Seat 10 hawn phalna an dawn bakah damdawi In khum (private bed) 30 leh ICU khum 13 hawn a nih thu te a sawi a. Mizoram State Health Care Society chuan State chhung leh pawna sawrkar leh mimal damdawi Inah te Cashless hmanga inenkawl theihna a siam thu te a sawi bawk a ni.

Mizoram chuan Ayushman Card 100% tuamchhuakin, hei hian chhungkaw nuai 2.22 leh mi nuai 5.91 te a huam thu pawh Larsap chuan sawiin, Ruihhlo ngaite enkawlna 'Huhliap Short Stay Centre' ah Batch 6 lutin mi 1,488 te enkawl an ni tawh a, Jordan Centre chu Mizoram Synod kutah hlan niin Kum 2025-26 chhingin Anganwadi Centre 1,500 te Saksham AWC-ah hlankai an ni a. Mizoram chu sum peipunna tha a siam turin 'Industrial Investment Policy of Mizoram, 2025' siam niin, sawrkar kum kal mek 2025-26 chhungin PMJVK hnuaiah project thar 10, cheng vbc. 186.83 hu pawm a ni tih a sawi a. Mipui Aw kaltlanga vuivaina 197 dawn zinga 161 te chinfel niin 36 te buaipui mek a nih thu pawh sawiin, Digital lama hmalak that avangin ICT Department chuan 'DigiLocker Accelerator Award' a dawn thu a sawi bawk.