Tripura atanga Mizoram-a Natural Gas thlunzawm hna thawh mekah za zela 45 zawhfel a ni tawh

Gas Pipe hmanga Tripura atanga Mizoram-a Natural Gas thlunzawm hna thawh mek ah hna thawh tur za zela 45 vel thawh zawh a ni tawh.

Food Civil Supply & Consumers Affairs Minister B. Lalchhanzova chuan Gas Pipe hmanga Tripura atanga Mizorama Natural Gas thlunzawm hna thawh mekte endikin Agartala a tlawh a, nimin khan Tripura Natural Gas Corporation Limited hotute nen inkawmin Tripura-a Natural Gas hmangtu Industry lian PRAN Beverages (India) Pvt. Ltd., Tripura Industrial Growth Centre, CNG Station leh ONGC hmunpuite a tlawh bakah eirawngbawl nana Natural Gas hmangtu pipeline connection 330 awmna Subham Solitaire a tlawh bawk a. Natural Gas Pipeline hi Panisagar Terminal (Tripura) atanga intan niin Sihhmui, Mizoram-ah Receiving Terminal bun a ni dawn a. Panisagar leh Sihhmui (Mizoram) inkar pipe thui zawng hi Km 119.5 niin Pipe diameter hi feet 1 a ni a, leimin leh shock laka him tur pipe hman niin pipeline hian Kanhmun, Zawlnuam, Kawrthah, Tuidam, Darlak, Mamit, Lengte te a paltlang dawn a; Panisagar - Sihhmui inkara Pipe phum hna hi Indradhanush Gas Grid Limited (IGCL) ten thawkin, Sihhmui Terminal atanga Aizawl khawpui chhunga Gas sem darh leh enkawlzui hna chu Tripura Natural Gas Corporation Limited (TNGCL) ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni a. Tripura - Mizoram Gas Pipeline Project hi North East Natural Gas Pipeline Grid hnuaia mi niin, kum 2027 December thla velah thawh zawh hman beisei a ni a, tun dinhmunah 45% vel thawh zawh tawh a nih thu IGCL hotute chuan an sawi a ni.

FCS&CA Minister chuan Tripura State ten Natural Gas an hman tangkai dan belchiang tur te, Mizoram-ah pawh zau zawk leh tangkai zawka hman a nih ve theih dan turte zirchiang tura kal an nih thu sawiin, eirawngbawlna gas thianghlim leh tha zawk, pipe connection hmanga hnianghnar leh man tlawm zawk neih theih a ni tur chu Mizo mipuite tan pawh thil hlu tak a nih tur thu a sawi a; Domestic mai bakah Commercial, Industry, Transport leh thil dangahte pawh tangkai taka hman ve tum a nih thu sawiin, Gas Supply a that phawt chuan Industry lian tham tak tak pawh Mizoram-ah kalpui ve theih a nih tur thu leh thalai hna neilote tan pawh eizawnna siamtu hnar, employment generation pawimawh tak a nih tur thu a sawi bawk. Supply Minister chuan Project a hlawhtlin ngei theih nan leh a hun taka thawh zawh a nih theih nan hnathawktute chu uluk leh thahnemngai taka thawk tura chahin duhsakna a hlan a; IGCL leh TNGCL hotute pawhin Mizoram sawrkarin an phurpuinaah lawmthu an sawi ve bawk a ni.