Kan thalaite a tam thei ang ber India sipaiah lut se kan duh a, kan theih ang angin hma kan la - Chief Minister

Chief Minister Lalduhoma chuan kan thalai a tam thei ang ber Sipai-ah lut se an duh thu leh chumi atan chuan hma an lak thu sawiin, Mizoram sawrkarin veterans te tana hamthatna a buaipui hrang hrang a buaipui thu leh Central sawrkar atanga hamthatna an dawn chu kum khatah cheng vbc. 180 vel a tlin thin thu a sawi bawk.

Sainik Welfare & Settlement Department bultumin nimin khan Aizawl-a Loch House (Gajraj Hall)-ah ‘10th Armed Forces Veteran Day cum Ex- Services Reunion of Mizoram’ chu neih niin he hun a hmanpuina ah Chief Minister Lalduhoma chuan Sawrkar chuan thalaite a tam thei ang ber India sipaiah lut se an duh thu leh chumi atan chuan hma an lak thu sawiin, “Territorial Army kan din bawk a, kan thalaiten ngaihven se kan duh hle. Sainik School kan neih chhun Chhingchhip Sainik, School-a lut duh te pawh hi an tlem riau mai a. Tan kan lak a tul hle a ni,” a ti a. Mizoram sawrkarin Veterans te tana hamthatna a buaipui hrang hrangte sawiin, “Financial year kalta ah khan kum 65 chunglam, sipai bang pension la ve lo te tan sawrkar chuan Penury Grant cheng nuai 49.44 dil chhuah a ni a, sipai bang fate Scholarship tur cheng nuai 47.4 dil chhuah a ni a, sipai nupui hmeithaite inzirna atan cheng nuai 2.5 leh sipai bang fanute pasal neih tanpui nan cheng nuai 4 pekchhuah a ni,” a ti a. Tun Financial year kal mekah hian sipai huaisen chawimawina dawngte lawmpui nan cheng nuai 16 pekchhuah tawh a nih thu leh pek tur an la awm zel tura ngaih a ni tih a sawi bawk.

Ex-Servicemen Contributory Health Scheme hnuaiah a thlawna inenkawlna hmun atan ZMC&H leh Zemabawk Cancer Hospital chu dah thar a nih thu Chief Minister chuan sawiin, “Sawrkar hna laknaah 5% reservation siamsak mek an ni. Tunah hian Mizoram-ah Ex-Servicemen 6170 leh hmeithai (dependent) mi 2483 an awm a. Central sawrkar atanga hamthatna an dawn hi kum khatah cheng vbc. 180 vel a tling thin,” a ti bawk.

Armed Forces Veteran Day hi India ram pum-a sipai hmunah leh State hrang hrangah Sainik Welfare Department te bultumin a rualin an hmang a, Mahni nunna thapa ram venhim hna thawktute zahna ni ah te, sipai bangte leh a tanglaite inpawhna tha siam nan leh ram venhimna lama rilru tuaithar nan te hman a ni a. Nimin-a Aizawl-a he hun hman ah hian Sainik Welfare & Resettlement Director, Surg. Lt. Cdr. Lalnun-tluanga chuan inlawmna thu sawiin, Armed Forces Veteran Day hman a nih chhan tlangpui a tarlang bawk.

He hunah hian khual zahawm Home Minister K. Sapdanga pawhin Mizoram chuan lungawi tak, lungleng tak siin Armed Forces Veteran Day hi an lawm tih sawiin, “Kan sipaite hian nunna aia ram himna dah chungnung zawkin an vanglai leh an thatlai ni te an hmangral a. A then hlim taka an rawn kir laiin a thenin an nunna an hlan a. Ram tana an inpekna hi a hlu kan ti a, kan zahin kan chawimawi a ni,” a ti.

Armed Forces Veteran Day hi India ram pumah kum 2017 atang khan hman tan niin January 14-ah hman thin a ni a. He ni hi First Commander-in-Chief of the Armed Forces, Field Marshal KM Cariappa OBE, kum 1953-a pension-a a chhuah ni a ni a. Kumin Armed Forces Veteran Day hi a vawi sawmna niin Mizoram-ah chuan vawi thum an hmanna niin sawrkar mi pawimawh ten an telpui bawk a ni.

Nimin-a he hun hman ah hian Chief Minister hian lawmman chi hrang hrang a sem nghal a, a dawngtu zingah hian nikum lama India ram sipai huaisen chawimawina sang ber pahnihna, Kirti Chakra dawngtu Captain Lalrinawma Sailo a tel a. Ani hi Mizo zinga Kirti Chakra dawng thei pahnihna niin Mizo-ram sawrkar chuan lawmpuina cheng nuai sawm a pe a ni.