Horticulture Minister hovin inhlanthar hun hmang

Horticulture Department-a thawktute chuan nimin khan Aizawl-a Horticulture Directorate Conference Hall-ah kumthar inhlantharna hun an hmang a, Horticulture Minister C. Lalsawivunga chuan a telpui a ni.

Horticulture Department inhlantharna hunah hian Minister chuan Department pakhata an awm avangin inunauna, inpumkhatna, thawhhona tha an neih a tul thu sawiin, “Chhungkua kan nih angin kan ram tan, mipuite tan Pathian in thiamna leh finna talent min pekte chhawr tangkai tur kan ni,” a ti a. Mipuiin an dawr thin an nih avangin mi te berte leh kut-hnathawk mite rawn theih; mi tu pawhin an koh eih theih, an mamawha an lam ngamna an ni tur a ni tih sawiin, “Mi tupawh ina an mi hman tangkai theih tur, an mi chhawr theih tur kan ni tur a ni,” a ti bawk.

He hunah hian Horticulture Minister hian Horticulture Department lehkhabu pathum- Sapthei chin leh enkawl dan, Thlai venhimna damdawi him leh dik taka hman dan leh Viticulture Manual (Grape chin leh enkawl dan) te chu a tlangzarh nghal a. He huna tarlan a nih danin Sapthei hi Mizoram-ah 1004 Ha a zau velah chin niin tonnes 2230 vel kumtin tharchhuah a ni a. India ramah chuan Mizoram hi Sapthei chin tamna ber te zinga mi a nih thu leh export leh Processing potential nei tha tak a nih avangin Department pawhin Sapthei chinna kawngah nasa taka hmalak zel a tum tih tarlan a ni.

Grape pawh Mizorama thlai pawimawh tak a nih chhoh mek thu leh Champhai District-ah kuthnawkthawktuten hlawkna an hmuh mek thu tarlan a ni a, heng thlai pahnih chin leh enkawl dan bakah, thlai venhimna damdawi hman dan kuthnathawktuten an thiam theih nan nimin a tlangzarh tak lehkhabu pathum te hi Horticulture Department-in an buatsaih a ni.