Thla 10 chhungin nau piang 18,210 leh mitthi 6,794 an awm

Mizoram-ah nikum (2025) January atanga October thla chhung khan nau piang 18,210 leh mitthi 6,794 an awm a; thla 10 chhunga naupiang-ah hian hmeichhia aiin mipa an tam zawk a, mitthi-ah pawh hmeichhia aiin mipa an tam zawk.

Economics & Statistics Department-in Rural Registration Unit 633 leh Urban Registration Unit 290 a neih atanga thi leh piang zat (vital report) an dawn tawh chin an tarlan danin, nikum-a kumtir lam thla 10, January atanga October thla chhung khan thingtlang (Rural Area)-ah nau piang 6,793 leh khawpui (Urban Area)-ah nau piang 11,417 an awm a; naupiang 18,210 zinga 9,226 chu mipa niin midang 8,984 chu hmeichhia an ni a, hmeichhe naupiang aia mipa naupiang tamna hi 242 a ni.

Thla 10 chhunga mitthi zat chhinchhiah 6,794 zinga 2,286 chu Rural Area niin Urban Area-ah 4,508 an ni bawk a; mitthi te hi mipa 4,371 leh hmeichhia 2,423 an ni a, hmeichhe thi aiin mipa thi hi 1,948 laiin an tam zawk a ni. Rural Area-ah hian kum 1 hnuailam thi 83 an awm a, kum 1 atanga kum 5 inkar thi 28 leh thisa-a nau piang 25 an awm a. Urban area-ah kum 1 hnuailam thi 120 awmin kum 1 leh kum 5 inkar thi 10 leh thisaa nau piang 73 an awm bawk.

Economics & Statistics Department-in nikum record a tarlan tawh chinah Mizoram pumah nikum thla 10 chhung khan kum khat hnuailam thi 203-te hi mipa 114 leh hmeichhia 89 an ni a; kum 1 atanga kum 5 inkar thi 38-te hi mipa 22 leh hmeichhia 16 niin, thisaa nau piang 98-te hi mipa 54 leh hmeichhia 44 an ni bawk.